എറണാകുളം: കാലടി ശ്രീശങ്കരാചാര്യ സംസ്കൃത സർവകലാശാലയിൽ സസ്‌പെൻഷൻ നടപടിക്കെതിരെ വിദ്യാർത്ഥികൾ നടത്തുന്ന അനിശ്ചിതകാല നിരാഹാര സമരത്തിന് പൂർണ്ണ പിന്തുണ പ്രഖ്യാപിച്ച് പ്രതിപക്ഷ നേതാവ് പിണറായി വിജയൻ സമരപ്പന്തലിലെത്തി. സമരം പന്ത്രണ്ടാം ദിവസത്തിലേക്ക് കടന്നപ്പോഴാണ് നാടാകെ വിദ്യാർത്ഥികൾക്കൊപ്പമുണ്ടെന്ന് വ്യക്തമാക്കി അദ്ദേഹം നേരിട്ടെത്തിയത്; നടപടി തിരുത്തുന്നത് വരെ സമരം തുടരുമെന്നും വിദ്യാർത്ഥികളെ സസ്‌പെൻഷനിൽ നിർത്തി ഭാവി നശിപ്പിക്കാമെന്ന വ്യാമോഹം വേണ്ടെന്നും അദ്ദേഹം പറഞ്ഞു.
നുണകൾ സൃഷ്ടിക്കാനും പ്രചരിപ്പിക്കാനും വൈദഗ്ധ്യം ലഭിച്ച ആർഎസ്എസിന്റെ ഇഷ്ട തോഴിയായാണ് സർവകലാശാല വൈസ് ചാൻസലർ പ്രവർത്തിക്കുന്നതെന്ന് പിണറായി വിജയൻ ആരോപിച്ചു. വിദ്യാർത്ഥികൾ തന്റെ ശവദാഹം നടത്തിയെന്ന വിസിയുടെ പരാതി പച്ചക്കള്ളമാണെന്നും, നാടകം അവതരിപ്പിച്ച ദിവസങ്ങളിലൊന്നും ഇല്ലാതിരുന്ന പരാതി ദിവസങ്ങൾക്ക് ശേഷം മുൻ ഗവർണർ ആർലേക്കറും വിസിയും ചേർന്ന് നടത്തിയ ഗൂഢാലോചനയിലൂടെ സൃഷ്ടിക്കപ്പെട്ടതാണെന്നും, തുടർന്ന് 16 പേരെ കണ്ടെത്തി സസ്‌പെൻഡ് ചെയ്യുകയായിരുന്നുവെന്നും അദ്ദേഹം കുറ്റപ്പെടുത്തി.
വിദ്യാർത്ഥികളോട് ശത്രുത പുലർത്തുന്നവരെ അധ്യാപകരായി കണക്കാക്കാനാവില്ലെന്നും, കള്ളം പൊളിഞ്ഞ സാഹചര്യത്തിൽ വിസി തിരുത്താൻ തയ്യാറാകണമെന്നും അനാവശ്യ പിടിവാശിയാണ് വിദ്യാർത്ഥികളുടെ സസ്‌പെൻഷൻ നീളാൻ കാരണമെന്നും അദ്ദേഹം ചൂണ്ടിക്കാട്ടി. വിദ്യാർത്ഥി പ്രസ്ഥാനത്തിലൂടെ രാഷ്ട്രീയത്തിലെത്തിയ മുഖ്യമന്ത്രിയും വിദ്യാഭ്യാസ മന്ത്രിയും കുട്ടികളെ സംരക്ഷിക്കാൻ തയ്യാറാകുന്നില്ലെന്ന് വിമർശിച്ച പിണറായി, സർവകലാശാലയുടെ നടപടിയെ ഹൈക്കോടതി വിമർശിച്ചത് നാടിന്റെ പ്രതികരണത്തിന് ഉദാഹരണമാണെന്നും സർക്കാരിന്റെ പോക്ക് തിരുത്തേണ്ടതുണ്ടെന്നും വ്യക്തമാക്കി. അതിനിടെ, സസ്‌പെൻഷൻ പിൻവലിക്കണമെന്നും പരീക്ഷയെഴുതാൻ അനുവദിക്കണമെന്നും ആവശ്യപ്പെട്ട് വിദ്യാർത്ഥികൾ നൽകിയ ഹർജി ഹൈക്കോടതി ഇന്ന് വീണ്ടും പരിഗണിക്കും.
