കൊച്ചി: അവയവദാനത്തിന് സന്നദ്ധരായവരെ കണ്ടെത്തുന്നതിനായി ഡിജിറ്റൽ പ്ലാറ്റ്‌ഫോം രൂപീകരിക്കണമെന്നും, വൃക്ക കൈമാറ്റത്തിലൂടെ കൂടുതൽ പേർക്ക് ജീവൻ രക്ഷിക്കാൻ സ്വാപ്പ് ഡൊണേഷൻ പദ്ധതി നടപ്പാക്കണമെന്നും കേരള ഹൈക്കോടതി നിർദേശിച്ചു. അവയവദാനവുമായി ബന്ധപ്പെട്ട് സംസ്ഥാനതല സമിതി സമർപ്പിച്ച ശുപാർശകൾ അംഗീകരിച്ച് നടപ്പാക്കേണ്ടത് സംസ്ഥാന സർക്കാരിന്റെ ഉത്തരവാദിത്തമാണെന്ന് ഓർമ്മിപ്പിച്ചുകൊണ്ടാണ് കോടതി ഹർജി തീർപ്പാക്കിയത്.

കേരള സ്റ്റേറ്റ് ഓർഗൻ ആൻഡ് ടിഷ്യു ട്രാൻസ്‌പ്ലാന്റ് ഓർഗനൈസേഷന്റെ (K-SOTTO) നേതൃത്വത്തിൽ ആരംഭിക്കുന്ന ഡിജിറ്റൽ പ്ലാറ്റ്‌ഫോം വഴി സന്നദ്ധ അവയവദാതാക്കളുടെ അപേക്ഷകൾ സ്വീകരിക്കണമെന്നാണ് നിർദേശം. സ്വാപ്പ് വൃക്കദാന പദ്ധതി നടപ്പാക്കുക, ദാതാക്കളുടെയും സ്വീകർത്താക്കളുടെയും വിവരങ്ങൾ രഹസ്യമായി സൂക്ഷിക്കുക, ചികിത്സാച്ചെലവിൽ സുതാര്യത ഉറപ്പാക്കുക, അനുമതി നടപടികൾ ലളിതമാക്കുക തുടങ്ങിയ ഉപദേശക സമിതിയുടെ ശുപാർശകളും സുപ്രീം കോടതി നിർദേശങ്ങളും കോടതി വിശദമായി പരിശോധിച്ചു.

വൃക്കമാറ്റിവയ്ക്കലിനായി കാത്തിരിക്കെ പിതാവ് മരിച്ചതിനെത്തുടർന്ന് തൃശൂർ സ്വദേശി അദ്വൈത് എം. സമർപ്പിച്ച ഹർജിയിലാണ് ഹൈക്കോടതിയുടെ ഈ ഇടപെടൽ. അവയവദാനവുമായി ബന്ധപ്പെട്ട് 2017-ൽ ഹൈക്കോടതി നൽകിയ നിർദേശങ്ങൾ നടപ്പാക്കിയില്ലെന്ന് ചൂണ്ടിക്കാട്ടിയ ഹർജിക്കാരൻ, സന്നദ്ധ ദാതാക്കളെ കണ്ടെത്താൻ പത്ര-ദൃശ്യ മാധ്യമങ്ങളിലൂടെ പരസ്യം നൽകണമെന്നും ആവശ്യപ്പെട്ടിരുന്നു.