കൊച്ചി: ചേരാനല്ലൂർ വാഹനാപകടക്കേസിൽ പ്രതിയായ പതിനേഴുകാരന്റെ മൊഴി അന്വേഷണ സംഘം വീണ്ടും രേഖപ്പെടുത്തി. മുൻപും കാറും ബൈക്കും ഓടിച്ചിട്ടുണ്ടെന്നും, ബൈക്കിൽ സ്കൂളിൽ പോയിട്ടുണ്ടെന്നും കൗമാരക്കാരൻ ജില്ലാ ക്രൈംബ്രാഞ്ചിന് മുന്നിൽ സമ്മതിച്ചു.
സോഷ്യൽ ബാക്ഗ്രൗണ്ട് റിപ്പോർട്ട് തയ്യാറാക്കുന്നതിന് മുന്നോടിയായി വ്യാഴാഴ്ചയാണ് മൊഴിയെടുത്തത്; പിതാവിന്റെ സാന്നിധ്യമില്ലാതെ പ്രതിയെ ചോദ്യം ചെയ്യാൻ ജില്ലാ ക്രൈംബ്രാഞ്ച് കോടതിയിൽ നിന്ന് പ്രത്യേക അനുമതി തേടിയിരുന്നു. പ്രതിയുടെ മൊഴിയുടെ അടിസ്ഥാനത്തിൽ അന്വേഷണ സംഘം ഉടൻ തന്നെ സോഷ്യൽ ബാക്ഗ്രൗണ്ട് റിപ്പോർട്ട് സമർപ്പിക്കും.
പ്രതി മുൻപും വാഹനമോടിച്ചിരുന്നതുമായി ബന്ധപ്പെട്ട് ക്രൈംബ്രാഞ്ചിന് നേരത്തെ ലഭിച്ച തെളിവുകൾ ശരിവയ്ക്കുന്നതാണ് പുതിയ മൊഴി. അപകടത്തിൽ മരിച്ച ജയബാലകൃഷ്ണന്റെ മകൾ ഭദ്രകീർത്തിയും പതിനേഴുകാരൻ ബൈക്ക് ഓടിച്ച് സ്കൂളിൽ പോയിരുന്നുവെന്ന് മുൻപ് ആരോപിച്ചിരുന്നു.
