തിരുവനന്തപുരം: എൽപിഎസ്ടി റാങ്ക് ഹോൾഡേഴ്‌സിന്റെ സമരപ്പന്തൽ പൊളിച്ചുനീക്കിയ സർക്കാർ നടപടിക്കെതിരെ രൂക്ഷവിമർശനവുമായി മുൻ മന്ത്രി പി. രാജീവ്. നരേന്ദ്ര മോദിയേക്കാൾ മോശമായ രീതിയിലാണ് വി.ഡി. സതീശൻ പെരുമാറുന്നതെന്നും, ഡൽഹിയിലെ ജന്തർ മന്തറിൽ സമരം നടത്തിയ കോൺഗ്രസാണ് കേരളത്തിൽ സമരപ്പന്തൽ പൊളിച്ചുനീക്കിയതെന്നും അദ്ദേഹം കുറ്റപ്പെടുത്തി.

സമരപ്പന്തൽ പൊളിക്കാൻ കോടതി ഉത്തരവുണ്ടെന്നാണ് സർക്കാർ പറയുന്നതെങ്കിലും, ഏത് കോടതി വിധിയുടെ അടിസ്ഥാനത്തിലാണ് ഈ നടപടിയെടുത്തതെന്ന് പി. രാജീവ് ചോദിച്ചു. എല്ലാം ചെയ്തുതരാമെന്ന് വാഗ്ദാനം നൽകിയാണ് പി.എസ്.സി റാങ്ക് ഹോൾഡേഴ്‌സിനെ സമരത്തിനിറക്കിയതെന്നും, 10 മിനിറ്റ് കൊണ്ട് പ്രശ്നം തീർക്കാമെന്ന് പറഞ്ഞ വാഗ്ദാനങ്ങളെല്ലാം എവിടെപ്പോയെന്നും അദ്ദേഹം വിമർശിച്ചു.

മുൻപ് ആശാവർക്കർമാരുടെ സമരപ്പന്തലിൽ പ്രതിപക്ഷ നേതാവായിരുന്ന വി.ഡി. സതീശൻ സന്ദർശനം നടത്തിയപ്പോൾ ആരും സമരപ്പന്തൽ പൊളിച്ചുനീക്കിയിരുന്നില്ലെന്ന് രാജീവ് ചൂണ്ടിക്കാട്ടി. അതിനുശേഷം പുതിയതായി ഏത് കോടതി വിധിയാണ് ഉണ്ടായതെന്നും അദ്ദേഹം ചോദ്യമുയർത്തി.