എൽപിഎസ്ടി റാങ്ക് ഹോൾഡേഴ്‌സിന്റെ സമരവുമായി ബന്ധപ്പെട്ട് അധ്യാപക-വിദ്യാർത്ഥി അനുപാതം തൽക്കാലം കുറയ്ക്കാൻ കഴിയില്ലെന്ന് മന്ത്രി എൻ. ഷംസുദ്ദീൻ വ്യക്തമാക്കി. അനുപാതം കുറച്ചാൽ 400 കോടി രൂപയുടെ അധിക സാമ്പത്തിക ബാധ്യത വരുമെന്നും, സ്കൂളുകളിൽ ഇത്തവണ ഒരു ലക്ഷത്തിലധികം കുട്ടികളുടെ കുറവുണ്ടായ സാഹചര്യത്തിൽ ഇത് പ്രായോഗികമല്ലെന്നും അദ്ദേഹം വിശദീകരിച്ചു.
കേരളത്തിലെ ജനനനിരക്ക് ഗണ്യമായി കുറയുന്നതാണ് സ്കൂളുകളിലെ കുട്ടികളുടെ എണ്ണം കുറയാൻ കാരണമാകുന്നതെന്ന് മന്ത്രി ചൂണ്ടിക്കാട്ടി. കഴിഞ്ഞ സർക്കാരിന്റെ തീരുമാനമാണ് നിലവിലും തുടരുന്നതെന്നും, എയ്ഡഡ് മേഖലയ്ക്ക് വാരിക്കോരി നൽകിയെന്ന പ്രചാരണം അടിസ്ഥാനരഹിതമാണെന്നും കഴിഞ്ഞ സർക്കാർ ചെയ്ത കാര്യങ്ങൾ മാത്രമാണ് ഇപ്പോഴുമുള്ളതെന്നും അദ്ദേഹം പറഞ്ഞു.
പരമാവധി ഒഴിവുകൾ സർക്കാർ റിപ്പോർട്ട് ചെയ്യിപ്പിക്കുന്നുണ്ടെന്നും, കഴിഞ്ഞ സർക്കാരിന്റെ കാലത്ത് ഒരാളെപ്പോലും നിയമിക്കാത്ത റാങ്ക് ലിസ്റ്റുകൾ ഉണ്ടായിരുന്നെന്നും മന്ത്രി ഓർമ്മിപ്പിച്ചു. റാങ്ക് ലിസ്റ്റിൽ ഉൾപ്പെട്ടതുകൊണ്ട് മാത്രം എല്ലാ നിയമങ്ങളും മാറ്റണമെന്ന് ആവശ്യപ്പെടുന്നത് ശരിയല്ലെന്നും, ഈ പ്രശ്നങ്ങളെല്ലാം സൃഷ്ടിച്ചത് പി.എസ്.സിയാണെന്നും അദ്ദേഹം കുറ്റപ്പെടുത്തി.
മുൻപ് എൽപിഎസ്ടി സമരത്തിന് ഐക്യദാർഢ്യം നൽകുക മാത്രമാണ് ചെയ്തതെന്നും, അല്ലാതെ അനുപാതം കുറയ്ക്കാമെന്ന് പറഞ്ഞിട്ടില്ലെന്നും മന്ത്രി വ്യക്തമാക്കി. സമരക്കാരോട് എതിർപ്പില്ലെന്നും റാങ്ക് ലിസ്റ്റിലുള്ള പലർക്കും സമരത്തോട് വിയോജിപ്പുണ്ടെന്നും പറഞ്ഞ അദ്ദേഹം, വഴി തടയരുതെന്ന കോടതി നിർദ്ദേശപ്രകാരം പൊലീസ് അവരുടെ ഡ്യൂട്ടി മാത്രമാണ് ചെയ്തതെന്ന് ചൂണ്ടിക്കാട്ടി സമരപ്പന്തൽ പൊളിച്ച നടപടിയെയും ന്യായീകരിച്ചു.
