തിരുവനന്തപുരം: ലയണൽ മെസ്സിയെ കേരളത്തിലെത്തിക്കുമെന്ന് വാഗ്ദാനം ചെയ്ത് നടത്തിയ തട്ടിപ്പിൽ മുൻ കായിക മന്ത്രി വി. അബ്ദുറഹിമാനെതിരെ അന്വേഷണം നടത്താൻ ഗവർണർ അനുമതി നൽകി. മുൻ മന്ത്രിയെന്ന നിലയിൽ അബ്ദുറഹിമാനെ കേസിൽ പ്രതിചേർക്കുന്നതിനായി സർക്കാർ ഗവർണറുടെ അനുമതി തേടിയിരുന്നു; പദ്ധതിയുമായി ബന്ധപ്പെട്ട സാമ്പത്തിക ഇടപാടുകളിലെ ക്രമക്കേടുകളും മുൻ മന്ത്രി ഉൾപ്പെടെയുള്ളവരുടെ ഇടപെടലുകളും വിദേശയാത്രകളുമാണ് അന്വേഷണ പരിധിയിലുള്ളത്.
അതേസമയം, അർജന്റീന ഫുട്‌ബോൾ അസോസിയേഷന് ഒൻപത് മില്യൺ യുഎസ് ഡോളർ (ഏകദേശം 126 കോടി രൂപ) കൈമാറിയെന്ന സ്‌പോൺസറുടെ അവകാശവാദം സ്ഥിരീകരിക്കുന്ന ഔദ്യോഗിക രേഖകളൊന്നും സർക്കാരിന്റെ പക്കലില്ലെന്ന് കായിക മന്ത്രി ഒ.ജെ. ജനീഷ് നിയമസഭയിൽ വ്യക്തമാക്കി. പണം കൈമാറിയതിന്റെ ബാങ്ക് രേഖകളോ ഔദ്യോഗിക രസീതുകളോ ലഭിച്ചിട്ടില്ലെന്നും അദ്ദേഹം അറിയിച്ചു.
നേരത്തെ, പദ്ധതിയുമായി ബന്ധപ്പെട്ട് വഴിവിട്ട ഇടപെടലുകൾ നടത്തിയെന്ന പ്രത്യേക അന്വേഷണ സംഘത്തിന്റെ കണ്ടെത്തലിനെ തുടർന്ന് യു. ഷറഫലി, സി. സത്യപാലൻ എന്നിവർക്കെതിരെ അന്വേഷണം നടത്താൻ സർക്കാർ അനുമതി നൽകിയിരുന്നു.
