കൊച്ചി: നടി അടക്കമുള്ളവർ തന്നെ ഫ്ലാറ്റിൽ പൂട്ടിയിട്ട് മർദ്ദിച്ചുവെന്ന് പരാതിപ്പെട്ട ഡോ. ജോൺസൺ കെ. വർഗീസിനെതിരെ ലൈംഗിക പീഡന പരാതിയുമായി നടിയുടെ ബന്ധുവായ യുവതി. മദ്യം നൽകി ക്രൂരമായി പീഡിപ്പിച്ചുവെന്ന യുവതിയുടെ മൊഴിയുടെ അടിസ്ഥാനത്തിൽ ഇൻഫോപാർക്ക് പോലീസ് ഡോക്ടർക്കെതിരെ ബലാത്സംഗക്കുറ്റത്തിന് കേസെടുത്തു. കേസ് രജിസ്റ്റർ ചെയ്തതിന് പിന്നാലെ ഇയാൾ ജോലി ചെയ്തിരുന്ന സ്വകാര്യ ആശുപത്രി ഡോക്ടറെ സർവീസിൽ നിന്ന് പുറത്താക്കി.
യുവ ഡോക്ടറുടെ പരാതിയിൽ നടിയും നടൻ ബിബിൻ പെരുമ്പിള്ളിയും ഉൾപ്പെടെ മൂന്ന് പേരെ കടവന്ത്ര പോലീസ് വ്യാഴാഴ്ച അറസ്റ്റ് ചെയ്തിരുന്നു. ആകെ 12 പ്രതികളുള്ള കേസിൽ ബാക്കിയുള്ളവർക്കായി തിരച്ചിൽ തുടരുന്നതിനിടയിലാണ് നടിയുടെ ബന്ധു പോലീസിനെ സമീപിച്ച് പുതിയ പരാതി നൽകിയത്.
നടിയുടെ അമ്മയുടെ സഹോദരിക്ക് സുഖമില്ലെന്ന് പറഞ്ഞ് നവംബർ രണ്ടിന് തന്നെ വൈറ്റിലയിലെ ഫ്ലാറ്റിലേക്ക് വിളിച്ചുവരുത്തി മർദ്ദിക്കുകയായിരുന്നുവെന്നാണ് ഡോക്ടറുടെ പരാതി. മുറിയിൽ പൂട്ടിയിട്ട് മർദ്ദിച്ചതിനൊപ്പം മൂന്ന് ലക്ഷത്തോളം രൂപ വിലമതിക്കുന്ന രണ്ട് മൊബൈൽ ഫോണുകൾ തട്ടിയെടുത്തെന്നും, ലഹരി നൽകി രോഗിയെ പീഡിപ്പിക്കാൻ ശ്രമിച്ചെന്ന് പരാതിപ്പെടുമെന്ന് ഭീഷണിപ്പെടുത്തിയെന്നും ഡോക്ടർ ആരോപിച്ചിരുന്നു. മുൻപരിചയം ഉള്ളതുകൊണ്ടാണ് താൻ ഫ്ലാറ്റിലെത്തിയതെന്നും ഡോക്ടർ വ്യക്തമാക്കിയിരുന്നു.
