തിരുവനന്തപുരം: മിൽമ തിരുവനന്തപുരം മേഖലാ യൂണിയൻ ഭരണസമിതിയെ പിരിച്ചുവിട്ട സർക്കാർ ഉത്തരവ് ഹൈക്കോടതി ഡിവിഷൻ ബെഞ്ച് റദ്ദാക്കിയതിനെ തുടർന്ന് ഭരണസമിതി അംഗങ്ങൾ സ്വന്തം നിലയിൽ ആസ്ഥാനത്തെത്തി ചുമതലയേറ്റു. ബോർഡ് പുനഃസ്ഥാപിക്കാൻ കോടതി നിർദ്ദേശം നൽകിയതിനെ തുടർന്നായിരുന്നു നീക്കം. എന്നാൽ ചുമതലയേൽക്കൽ ചടങ്ങിൽ നിന്ന് മിൽമ മാനേജിംഗ് ഡയറക്ടറും രജിസ്ട്രാറും വിട്ടുനിന്നു.
ഉദ്യോഗസ്ഥർ ബോധപൂർവ്വം മാറിനിൽക്കുകയാണെന്ന് സംശയിക്കുന്നതായി മിൽമ തിരുവനന്തപുരം മേഖല ചെയർപേഴ്സൺ മണി വിശ്വനാഥ് ആരോപിച്ചു. വൈകിട്ട് മൂന്ന് മണി മുതൽ ഓഫീസിലുണ്ടായിരുന്നിട്ടും എംഡിയോ രജിസ്ട്രാറോ എത്തിയില്ലെന്നും മിനുട്സ് ബുക്ക് കൊടുത്തുവിടുമെന്ന് പറഞ്ഞെങ്കിലും നൽകിയില്ലെന്നും അദ്ദേഹം വ്യക്തമാക്കി. മിനുട്സ് ബുക്ക് കൊണ്ടുപോയത് തന്നെ ചട്ടവിരുദ്ധമാണെന്നും നിയമോപദേശത്തിന്റെ അടിസ്ഥാനത്തിൽ പുതിയ മിനുട്സ് ബുക്ക് വാങ്ങിയാണ് ചുമതലയേറ്റെടുത്തതെന്നും മണി വിശ്വനാഥ് പറഞ്ഞു.
2026 ജൂലൈ 25-നായിരുന്നു മിൽമ തിരുവനന്തപുരം മേഖലാ യൂണിയൻ ഭരണസമിതിയെ സർക്കാർ പിരിച്ചുവിട്ടത്. സർക്കാരിന്റെ ഭാഗത്തുനിന്നുണ്ടായത് സ്വാഭാവിക നീതി നിഷേധമാണെന്ന് സിപിഐഎം നേതാവ് എം.വി. ജയരാജൻ കുറ്റപ്പെടുത്തി.
