കൊച്ചി: കാലടി സംസ്കൃത സർവകലാശാലയിലെ വിദ്യാർത്ഥികളുടെ സസ്‌പെൻഷനുമായി ബന്ധപ്പെട്ട കോടതി ഉത്തരവിന് പിന്നാലെ നിലപാട് വ്യക്തമാക്കി ഉന്നത വിദ്യാഭ്യാസ വകുപ്പ് മന്ത്രി റോജി എം. ജോൺ. വിദ്യാർത്ഥികൾക്ക് പരീക്ഷയെഴുതാൻ അവസരമൊരുക്കണമെന്നാണ് സിൻഡിക്കേറ്റിന്റെയും സർക്കാരിന്റെയും ആഗ്രഹമെന്നും, എന്നാൽ വിദ്യാർത്ഥികളുടെ ഭാഗത്തുനിന്ന് വീഴ്ചകൾ സംഭവിച്ചിട്ടുള്ളതിനാൽ മാപ്പെഴുതി നൽകിയാൽ മാത്രമേ തുടർസാഹചര്യം ഒരുങ്ങുകയുള്ളൂവെന്നും അദ്ദേഹം വ്യക്തമാക്കി. വിദ്യാർത്ഥികളുടെ പരീക്ഷ മുടങ്ങുന്നതിൽ തനിക്ക് സന്തോഷമില്ലെന്നും അവരുടെ ഭാവി തകരരുതെന്നാണ് കരുതുന്നതെന്നും അദ്ദേഹം പറഞ്ഞു.
വിദ്യാർത്ഥി രാഷ്ട്രീയത്തിന് ആരും എതിരല്ലെങ്കിലും പ്രക്ഷോഭങ്ങൾ അക്രമത്തിലേക്കും അരാജകത്വത്തിലേക്കും വഴിമാറി ക്യാമ്പസ് രാഷ്ട്രീയം മുന്നോട്ടുപോകാൻ പാടില്ലെന്ന് മന്ത്രി ഓർമ്മിപ്പിച്ചു.
മുൻപ് ഹയർസെക്കൻഡറി ഡയറക്ടറായിരുന്ന കേശവേന്ദ്ര കുമാറിന് നേരെ കെഎസ്‌യു നടത്തിയ കരിഓയിൽ പ്രയോഗത്തെക്കുറിച്ചും മന്ത്രി പ്രതികരിച്ചു. ആ സംഭവം നടക്കുന്നത് തന്റെ പ്രവർത്തന കാലഘട്ടത്തിലല്ലെന്നും അന്നത്തെ ആ സമരരീതിയെ തങ്ങൾ പൂർണ്ണമായും തള്ളിപ്പറഞ്ഞതാണെന്നും അദ്ദേഹം ചൂണ്ടിക്കാട്ടി. ഒരു സംഘടനയിൽ പ്രവർത്തിക്കുമ്പോൾ തെറ്റുകൾ സ്വാഭാവികമാണെന്നും അത് സ്വയം തിരുത്തേണ്ടത് ആ പ്രസ്ഥാനത്തിന്റെ ഉത്തരവാദിത്തമാണെന്നും മന്ത്രി കൂട്ടിച്ചേർത്തു.
