കൊച്ചി: കാലടി ശ്രീ ശങ്കരാചാര്യ സംസ്കൃത സർവകലാശാലയിലെ പരീക്ഷകൾ എഴുതുന്നതിൽ നിന്ന് തങ്ങളെ വിലക്കിയ ഹൈക്കോടതി ഡിവിഷൻ ബെഞ്ചിന്റെ വിധിക്കെതിരെ സസ്‌പെൻഷനിലായ വിദ്യാർത്ഥികൾ സുപ്രീം കോടതിയെ സമീപിച്ചു. അന്വേഷണവിധേയമായുള്ള സസ്പെൻഷൻ ഒരു ശിക്ഷാനടപടിയല്ലെന്നും, ഫീസ് സ്വീകരിച്ച് പരീക്ഷയെഴുതാൻ അനുമതി നൽകണമെന്നുമാണ് വിദ്യാർത്ഥികളുടെ ആവശ്യം. പിജി പരീക്ഷകൾ ആരംഭിക്കാൻ മണിക്കൂറുകൾ മാത്രം ശേഷിക്കെയാണ് വിദ്യാർത്ഥികളുടെ അടിയന്തര ഹർജി.
ഇന്ന് ആരംഭിക്കുന്ന പിജി പരീക്ഷയെഴുതേണ്ട ഏഴ് വിദ്യാർത്ഥികൾക്കും ആറാം തീയതി തുടങ്ങുന്ന യുജി പരീക്ഷയെഴുതേണ്ട മൂന്ന് വിദ്യാർത്ഥികൾക്കുമാണ് നിലവിൽ പരീക്ഷാ അവസരം നഷ്ടപ്പെടുന്നത്. സർവകലാശാലാ ചട്ടങ്ങളും യുജിസി മാനദണ്ഡങ്ങളും പാലിക്കാതെയാണ് സിംഗിൾ ബെഞ്ച് ഉത്തരവിറക്കിയതെന്ന് നിരീക്ഷിച്ച ഡിവിഷൻ ബെഞ്ച്, വിസിയുടെ അപ്പീൽ ശരിവെച്ചുകൊണ്ട് വിദ്യാർത്ഥികൾക്ക് പരീക്ഷയെഴുതാൻ കഴിയില്ലെന്ന് നേരത്തെ ഉത്തരവിടുകയായിരുന്നു.
ഹാജർ കുറവാണെന്ന് ചൂണ്ടിക്കാട്ടി വിദ്യാർത്ഥികളെ പരീക്ഷയെഴുതിക്കരുതെന്ന് ആവശ്യപ്പെട്ട് സർവകലാശാലാ വിസി തന്നെ കോടതിയിൽ അപ്പീൽ നൽകുന്നത് ചരിത്രത്തിലാദ്യമാണ്. വിസി സിസ തോമസിനെതിരെ സമരം ചെയ്തതിന് 60 ദിവസം മുൻപാണ് ഈ വിദ്യാർത്ഥികളെ സസ്‌പെൻഡ് ചെയ്തത്. ഇതിനിടെ, സർവകലാശാലാ കവാടത്തിന് മുന്നിൽ വിദ്യാർത്ഥികൾ നടത്തുന്ന നിരാഹാര സമരം ഇപ്പോഴും തുടരുകയാണ്.
