തിരുവനന്തപുരം: നിയമസഭയിൽ കള്ളം പറയുകയാണ് മുഖ്യമന്ത്രിയെന്ന ആരോപണവുമായി എൽപിഎസ്ടി ഉദ്യോഗാർത്ഥി സമരസമിതി രംഗത്ത്. തന്നെ സമ്മർദ്ദപ്പെടുത്തരുതെന്നും ബ്ലാക്ക് മെയിൽ ചെയ്യരുതെന്നുമാണ് വി.ഡി. സതീശൻ തങ്ങളോട് നേരിട്ട് പറഞ്ഞതെന്നും, മാധ്യമങ്ങളോടും നിയമസഭയിലും വ്യത്യസ്ത കാര്യങ്ങൾ സംസാരിക്കുന്നത് മുഖ്യമന്ത്രി പദവിക്ക് ചേർന്നതല്ലെന്നും കഴിഞ്ഞ ദിവസം തലമുണ്ഡനം ചെയ്ത് പ്രതിഷേധിച്ച സമരസമിതി നേതാവ് വളർമതി വ്യക്തമാക്കി. കാലാവധി നീട്ടാനുള്ള ശുപാർശ പിഎസ്‌സിക്ക് നൽകിയിട്ടുണ്ടെങ്കിൽ ആ രേഖ പരസ്യപ്പെടുത്താൻ അവർ സർക്കാരിനെ വെല്ലുവിളിച്ചു.
പ്രതിപക്ഷത്തിരുന്ന കാലത്ത് ഉദ്യോഗാർത്ഥികളുടെ പ്രതിഷേധങ്ങളെ അനുകൂലിച്ചവരാണ് ഇപ്പോൾ ഭരണം കിട്ടിയപ്പോൾ തിരിഞ്ഞുനിൽക്കുന്നതെന്ന് വളർമതി കുറ്റപ്പെടുത്തി. ഒപ്പം, അധ്യാപക-വിദ്യാർത്ഥി അനുപാതം കുറയ്ക്കണമെന്ന ആവശ്യത്തിൽ നിന്ന് പിന്നോട്ടില്ലെന്നും സമരക്കാർ ആവർത്തിച്ചു.
അതേസമയം, കഴിഞ്ഞ അഞ്ച് വർഷം സെക്രട്ടേറിയറ്റിന് മുന്നിൽ സമരം നടത്തിയവരെ തിരിഞ്ഞുനോക്കാത്തവരാണ് ഇപ്പോൾ തല മൊട്ടയടിച്ച ചിത്രം പ്രചരിപ്പിക്കുന്നതെന്നായിരുന്നു നിയമസഭയിൽ മുഖ്യമന്ത്രി വി.ഡി. സതീശന്റെ മറുപടി. സമരസമിതി മുന്നോട്ടുവെച്ച അഞ്ച് ആവശ്യങ്ങളിൽ നാലും യുഡിഎഫ് സർക്കാർ പരിഹരിച്ചുവെന്നും, അധ്യാപക-വിദ്യാർത്ഥി അനുപാതത്തിൽ പെട്ടെന്ന് മാറ്റം വരുത്താൻ സാധിക്കില്ലെന്നും അദ്ദേഹം പറഞ്ഞു. നിലവിലെ പ്രതിസന്ധികൾക്ക് കാരണം മുൻ എൽഡിഎഫ് സർക്കാരിന്റെ ബുദ്ധിശൂന്യതയാണെന്നും മുഖ്യമന്ത്രി സഭയിൽ അവകാശപ്പെട്ടിരുന്നു.
