കൊല്ലം: ശബരിമലയിലെ മിൽമ നെയ്യ് വിതരണത്തിലെ ക്രമക്കേടുമായി ബന്ധപ്പെട്ട് പിടിയിലായ കരാറുകാരൻ എസ്.എസ്. ബിനുവിനെ മൂന്ന് ദിവസത്തേക്ക് വിജിലൻസ് കസ്റ്റഡിയിൽ വിട്ടു. കൊല്ലം വിജിലൻസ് കോടതിയാണ് അന്വേഷണ സംഘത്തിന്റെ കസ്റ്റഡി അപേക്ഷ അനുവദിച്ചത്. പ്രതിയെ തിരുവനന്തപുരത്തെത്തിച്ച് വിശദമായി ചോദ്യം ചെയ്യുന്നതിനൊപ്പം തമിഴ്‌നാട്ടിൽ കൊണ്ടുപോയി തെളിവെടുപ്പ് നടത്തുമെന്നും കേസിൽ കൂടുതൽ അറസ്റ്റുകൾക്ക് സാധ്യതയുണ്ടെന്നും അധികൃതർ അറിയിച്ചു.
ശബരിമലയിലേക്ക് എത്തിക്കാൻ കൈപ്പറ്റിയ 11,040 കിലോഗ്രാം നെയ്യ് പ്രതി തമിഴ്‌നാട്ടിലെ രണ്ട് സ്വകാര്യ ഏജൻസികൾക്ക് മറിച്ചുവിറ്റതായി വിജിലൻസ് പ്രത്യേക അന്വേഷണ സംഘം (എസ്ഐടി) കണ്ടെത്തി. തമിഴ്‌നാട്ടിലെ ശ്രീ വെങ്കിടേശ്വര ട്രേഡേഴ്‌സ്, ലിയോ ട്രേഡേഴ്‌സ് എന്നീ സ്ഥാപനങ്ങൾക്കാണ് കൃത്രിമ രേഖകൾ ചമച്ച് നെയ്യ് കൈമാറിയത്.
വ്യാജ രേഖകൾ കാണിച്ച് ചെക്ക്‌പോസ്റ്റ് വഴിയാണ് ലോഡ് കടത്തിയതെന്നും, ഈ ഇടപാടിലൂടെ പ്രതി വൻ സാമ്പത്തിക നേട്ടം ഉണ്ടാക്കിയെന്നും വിജിലൻസിന്റെ റിമാൻഡ് റിപ്പോർട്ടിൽ വ്യക്തമാക്കുന്നു.
