കൊച്ചി: രാഷ്ട്രീയ കേരളം ഉറ്റുനോക്കുന്ന അരിയിൽ ഷുക്കൂർ വധക്കേസിൽ എറണാകുളം പ്രത്യേക സിബിഐ കോടതി നവംബർ 12-ന് വിധി പറയും. കേസിലെ പ്രതിപ്പട്ടികയിലുള്ള മുതിർന്ന സിപിഐഎം നേതാക്കളായ പി. ജയരാജൻ, ടി.വി. രാജേഷ് എന്നിവർക്കെതിരെ നേരത്തെ പൊലീസിന് മൊഴി നൽകിയിരുന്ന സാക്ഷികൾ സിബിഐ കോടതിയിൽ ഹാജരായിരുന്നില്ല.
2012 ഫെബ്രുവരി 20-നാണ് എംഎസ്എഫ് പ്രാദേശിക നേതാവായിരുന്ന അരിയിൽ സ്വദേശി അബ്ദുൽ ഷുക്കൂർ കൊല്ലപ്പെട്ടത്. അന്നത്തെ സിപിഐഎം കണ്ണൂർ ജില്ലാ സെക്രട്ടറിയായിരുന്ന പി. ജയരാജന്റെ വാഹനവ്യൂഹത്തിന് നേരെ കല്ലെറിഞ്ഞുവെന്ന് ആരോപിച്ച് ഷുക്കൂറിനെ തടങ്കലിൽ വെച്ച് വിചാരണ നടത്തി കൊലപ്പെടുത്തിയെന്നാണ് കേസ്.
കേസിൽ പ്രാഥമികമായി 18 സിപിഐഎം പ്രവർത്തകരെയാണ് പ്രതിചേർത്തിരുന്നത്. പിന്നീട് നടന്ന വിശദമായ ചോദ്യം ചെയ്യലുകൾക്കൊടുവിൽ പി. ജയരാജനെ അറസ്റ്റ് ചെയ്യുകയും, പ്രതിപ്പട്ടികയിലുൾപ്പെട്ട മുൻ എംഎൽഎ ടി.വി. രാജേഷ് കോടതിയിൽ കീഴടങ്ങുകയുമായിരുന്നു; ഇരുവരും യഥാക്രമം 32, 33 പ്രതികളാണ്.
