തിരുവനന്തപുരം: കിഫ്ബിയെ ഇനി സർക്കാരിന്റെ പൂർണ നിയന്ത്രണത്തിൽ കൊണ്ടുവരുമെന്നും ആരെയും പ്രത്യേക സാമ്രാജ്യമുണ്ടാക്കാൻ അനുവദിക്കില്ലെന്നും മുഖ്യമന്ത്രി വി.ഡി. സതീശൻ നിയമസഭയിൽ വ്യക്തമാക്കി. നിലവിലുള്ള വികസന പ്രവർത്തനങ്ങൾ അട്ടിമറിക്കപ്പെട്ടെന്ന ആരോപണം തള്ളിയ അദ്ദേഹം, നിലവിൽ നടക്കുന്ന 27,000 കോടി രൂപയുടെ പ്രവൃത്തികളും ടെൻഡർ ചെയ്യാനുള്ള 4,000 കോടി രൂപയുടെ പ്രവൃത്തികളും ഉൾപ്പെടെ ആകെ 31,761 കോടിയുടെ പദ്ധതികൾ തുടർന്നു കൊണ്ടുപോകുമെന്നും അറിയിച്ചു. സഭ നിർത്തിവെച്ച് കിഫ്ബി വിഷയത്തിൽ അടിയന്തര പ്രമേയം ചർച്ച ചെയ്യേണ്ട സാഹചര്യമില്ലെന്നും മുഖ്യമന്ത്രി വ്യക്തമാക്കി.
മുൻ സർക്കാർ വിപണി നിരക്കിലും ഉയർന്ന പലിശയ്ക്ക് തോന്നിയപോലെ വായ്പയെടുത്തതാണ് സംസ്ഥാനത്തെ ധനപ്രതിസന്ധിയിലാക്കിയതെന്ന് മുഖ്യമന്ത്രി ചൂണ്ടിക്കാട്ടി. നിലവിലെ പദ്ധതികൾ പൂർത്തിയാകുമ്പോൾ ആകെ ബാധ്യത 70,000 കോടി രൂപയാകും. ഇത് സംസ്ഥാന സർക്കാരിന്റെ വായ്പാ പരിധിയെ സാരമായി ബാധിച്ചിട്ടുണ്ടെന്നും ഇതിനകം 12,000 കോടിയുടെ കുറവുണ്ടായെന്നും അദ്ദേഹം പറഞ്ഞു; അതേസമയം ഈ സർക്കാരിന്റെ കാലത്ത് 15,000 കോടിയുടെ വായ്പാ ബാധ്യത കുറയ്ക്കാനായിട്ടുണ്ട്.
കിഫ്ബി വിദഗ്ധ സമിതി റിപ്പോർട്ട് കോർപ്പറേറ്റ് വൽക്കരണ അജണ്ടയാണെന്ന് ആരോപിക്കുന്ന മുൻ ധനമന്ത്രി കെ.എൻ. ബാലഗോപാൽ, നേരത്തെ കിഫ്ബിയുടെ കടമെടുപ്പിനെതിരെ കുറിപ്പെഴുതിയ ആളാണെന്ന് മുഖ്യമന്ത്രി ഓർമ്മിപ്പിച്ചു. സിയാൽ, ഗോശ്രീ പാലം, കലൂർ സ്റ്റേഡിയം, ഇൻഫോപാർക്ക്, ടെക്നോപാർക്ക്, കൊച്ചി മെട്രോ, കണ്ണൂർ വിമാനത്താവളം, വിഴിഞ്ഞം തുറമുഖം തുടങ്ങിയ വലിയ വികസനങ്ങളൊന്നും കിഫ്ബി വഴിയല്ല യാഥാർത്ഥ്യമായതെന്നും അദ്ദേഹം പറഞ്ഞു. താൻ പ്രതിപക്ഷ നേതാവായിരിക്കെ തന്റെ മണ്ഡലത്തിലെ സ്കൂൾ നിർമ്മാണങ്ങൾക്ക് പ്രതിവർഷം ഒരു കോടി രൂപ മാത്രം അനുവദിച്ച് വിവേചനം കാട്ടിയെന്നും അദ്ദേഹം ആരോപിച്ചു.
ചീഫ് സെക്രട്ടറിയേക്കാൾ ഉയർന്ന ശമ്പളത്തിൽ ആൾക്കാരെ തിരുകിക്കയറ്റിയതും, ആഗസ്റ്റിൽ മാത്രം കിഫ്ബി അനുമതി നൽകിയ അവയവമാറ്റ ഇൻസ്റ്റിറ്റ്യൂട്ടിന് മുൻ എൽഡിഎഫ് സർക്കാർ ഫെബ്രുവരിയിൽ തന്നെ തറക്കല്ലിട്ടതും ഖജനാവ് കൊള്ളയടിച്ചതിന് തുല്യമായ അഴിമതിയാണെന്ന് മുഖ്യമന്ത്രി പറഞ്ഞു. നിർമ്മാണ പ്രവർത്തനങ്ങൾക്ക് അനുയോജ്യമല്ലാത്ത കണ്ണൂരിലെ പാറക്വാറി ഭൂമി കിഫ്ബി ഏറ്റെടുത്തതടക്കമുള്ള ക്രമക്കേടുകൾ കൃത്യമായി അന്വേഷിക്കുമെന്നും ഉത്തരവാദികളായ ആരെയും വെറുതെ വിടില്ലെന്നും അദ്ദേഹം സഭയിൽ വ്യക്തമാക്കി.
