തിരുവനന്തപുരം: ആഭ്യന്തര വകുപ്പിന്റെ പ്രവർത്തനങ്ങളെയും പൊലീസിനെയും രൂക്ഷമായി വിമർശിച്ച് അമ്പലപ്പുഴ എംഎൽഎ ജി. സുധാകരൻ നിയമസഭയിൽ രംഗത്ത്. ആഭ്യന്തര മന്ത്രി രമേശ് ചെന്നിത്തല വ്യക്തിപരമായി മഹാനും നല്ലയാളുമാണെങ്കിലും അദ്ദേഹം കൈകാര്യം ചെയ്യുന്ന വകുപ്പ് വളരെ മോശമാണെന്ന് അദ്ദേഹം തുറന്നടിച്ചു. വകുപ്പ് മോശമാണെങ്കിൽ മന്ത്രി എങ്ങനെ നന്നാവുമെന്നും, വെളുത്ത് സുന്ദരനായിട്ടിരുന്നിട്ട് വല്ല കാര്യവുമുണ്ടോയെന്നും അദ്ദേഹം സഭയിൽ ചോദിച്ചു.
ചെന്നിത്തലയെ വ്യക്തിപരമായി അധിക്ഷേപിക്കുകയല്ലെന്നും എന്നാൽ ആഭ്യന്തര വകുപ്പ് എക്കാലത്തും പ്രശ്നമാണെന്നും സുധാകരൻ വ്യക്തമാക്കി. താൻ നല്ലവനാണെന്ന കാര്യം ചെന്നിത്തല ആസ്വദിക്കുകയാണെന്നും അതിലെ കെണി അദ്ദേഹത്തിന് മനസിലായിട്ടില്ലെന്നും പറഞ്ഞ എംഎൽഎ, പൊലീസുകാരുടെ വീഴ്ചകൾ ചൂണ്ടിക്കാട്ടി അവരെ നിയന്ത്രിക്കാൻ സർക്കാർ തയ്യാറാകണമെന്ന് ആവശ്യപ്പെട്ടു. 'യൂണിഫോം ധരിച്ച പൗരന്മാരാണ് പൊലീസ്, യൂണിഫോം ഇല്ലാത്ത പൊലീസാണ് പൗരന്മാർ' എന്ന് ഡൽഹി പൊലീസ് ആസ്ഥാനത്ത് രേഖപ്പെടുത്തിയിട്ടുള്ളത് ഓർമ്മിപ്പിച്ച അദ്ദേഹം, നിയമം അനുസരിക്കാൻ ജനങ്ങളെയും പൊലീസിനെയും ബോധ്യപ്പെടുത്തണമെന്ന് കൂട്ടിച്ചേർത്തു.
പൊലീസ് സേനയിൽ അംഗസംഖ്യ കുറവാണെന്നും അതിനാൽ കൂടുതൽ പൊലീസുകാരെയും വനിതാ പൊലീസുകാരെയും നിയമിക്കണമെന്നും സുധാകരൻ നിർദ്ദേശിച്ചു. അടിക്കാനും പിടിക്കാനും മാത്രമല്ല പൊലീസ് ഉള്ളതെന്നും എല്ലാ പഞ്ചായത്തുകളിലും പൊലീസിനെ വിന്യസിക്കണമെന്നും അദ്ദേഹം ആവശ്യപ്പെട്ടു. ഒപ്പം, സെക്രട്ടേറിയറ്റ് ഭരണത്തിൽ യാതൊരു മാറ്റവുമില്ലെന്നും മനുഷ്യത്വമില്ലാത്ത ഇടമായ അവിടം പുനഃസംഘടിപ്പിക്കണമെന്നും തുരുമ്പിച്ച സംവിധാനം മാറ്റിപ്പണിയണമെന്നും അദ്ദേഹം ആവശ്യപ്പെട്ടു.
