കൊച്ചി: ചേരാനല്ലൂർ ബെൻസ് കാറപകടക്കേസുമായി ബന്ധപ്പെട്ട് നാല് പൊലീസ് ഉദ്യോഗസ്ഥരെ സസ്‌പെൻഡ് ചെയ്ത നടപടിക്കെതിരെ സേനയ്ക്കുള്ളിൽ ശക്തമായ അതൃപ്തി. ജയബാലകൃഷ്ണൻ കൊല്ലപ്പെട്ട സംഭവത്തിൽ വാഹനം ഓടിച്ചത് ജഡ്ജിയുടെ മകനായതിനാൽ, ഓരോ നീക്കവും ഉന്നതതലത്തിൽ അറിയിച്ചിരുന്നുവെന്നാണ് താഴെത്തട്ടിലുള്ള ഉദ്യോഗസ്ഥരുടെ പക്ഷം.
എസ്എച്ച്ഒ വിശ്വജിത്ത്, സിഐ ശ്യാം കുമാർ, ഗ്രേഡ് എസ്ഐ മനോജ്, സിപിഒ അരുൺജിത്ത് എന്നിവർക്കെതിരെയാണ് നിലവിൽ അച്ചടക്കനടപടി സ്വീകരിച്ചിരിക്കുന്നത്. സെൻട്രൽ എസിപി, ഡിസിപി, കമ്മീഷണർ തുടങ്ങിയ ഉന്നത ഉദ്യോഗസ്ഥരെ കൃത്യമായി വിവരങ്ങൾ ധരിപ്പിച്ചാണ് മുന്നോട്ടുപോയതെന്നും സ്റ്റേഷനിലെ ജീവനക്കാരെ മാത്രം ബലിയാടാക്കുകയാണെന്നും സേനാംഗങ്ങൾ ആരോപിക്കുന്നു.
ഉന്നത ഉദ്യോഗസ്ഥരുടെ ഭാഗത്തുനിന്നുണ്ടായ മേൽനോട്ട വീഴ്ചകളെക്കുറിച്ച് അന്വേഷണം നടത്താതെ സ്റ്റേഷൻ തലത്തിലുള്ള നാലുപേരെ മാത്രം ശിക്ഷിച്ചതിലാണ് പൊലീസുകാർക്കിടയിൽ പ്രതിഷേധം പുകയുന്നത്.
