തിരുവനന്തപുരം: എറണാകുളത്ത് സംഘടിപ്പിക്കുന്ന 65-ാമത് സംസ്ഥാന സ്‌കൂൾ കലോത്സവത്തിന്റെ ഔദ്യോഗിക ലോഗോ രൂപകൽപ്പന ചെയ്യാൻ വിദ്യാർത്ഥികൾ, അധ്യാപകർ, പൊതുജനങ്ങൾ എന്നിവരിൽ നിന്നും എൻട്രികൾ ക്ഷണിച്ചു. തെരഞ്ഞെടുക്കുന്നതിനായി തയ്യാറാക്കിയ ലോഗോകൾ നവംബർ ഏഴിന് വൈകുന്നേരം അഞ്ച് മണിക്ക് മുൻപായി തിരുവനന്തപുരം ജഗതിയിലുള്ള പൊതുവിദ്യാഭ്യാസ ഡയറക്ടറുടെ കാര്യാലയത്തിൽ സമർപ്പിക്കണം.

2027 ജനുവരി 4 മുതൽ 8 വരെയാണ് കലോത്സവം അരങ്ങേറുന്നത്. വിവിധ കലാരൂപങ്ങളുടെ പ്രതീകങ്ങൾ കോർത്തിണക്കിയാകണം ലോഗോ തയ്യാറാക്കേണ്ടത്; ഇതിനൊപ്പം എറണാകുളം ജില്ലയുടെ തനിമ വ്യക്തമാക്കുന്ന അടയാളങ്ങളും അനുയോജ്യമായ രീതിയിൽ ഉൾപ്പെടുത്താം. കൂടാതെ, 'അറുപത്തി അഞ്ചാമത് സംസ്ഥാന സ്‌കൂൾ കലോത്സവം 2027 ജനുവരി 04 മുതൽ 08 വരെ എറണാകുളം' എന്ന വാചകം ലോഗോയിൽ വ്യക്തമായി രേഖപ്പെടുത്തിയിരിക്കണം.

ലോഗോ എഡിറ്റ് ചെയ്യാവുന്ന ഡിജിറ്റൽ ഫോർമാറ്റിൽ സിഡിയിലോ പെൻഡ്രൈവിലോ ഒപ്പം എ4 സൈസ് പേപ്പറിൽ കളർ പ്രിന്റായുമാണ് അയക്കേണ്ടത്. അപേക്ഷകൾ

 'പൊതുവിദ്യാഭ്യാസ അഡീഷണൽ ഡയറക്ടർ (ജനറൽ), പൊതുവിദ്യാഭ്യാസ ഡയറക്ടറുടെ കാര്യാലയം, ജഗതി, തിരുവനന്തപുരം - 14' എന്ന വിലാസത്തിലാണ് ലഭ്യമാക്കേണ്ടത്.