:കൊച്ചി: ചേരാനല്ലൂർ വാഹനാപകടക്കേസിൽ ബെൻസ് കാറോടിച്ച 17-കാരൻ ആഡംബര ബൈക്കും ഉപയോഗിച്ചിരുന്നതായി കണ്ടെത്തി. കാറുടമയായ ജഡ്ജിയുടെ വസതിയിൽ ഏഴ് മണിക്കൂറോളം നീണ്ട പരിശോധനയിലാണ് ജില്ലാ ക്രൈംബ്രാഞ്ചും പൊലീസും സൂപ്പർബൈക്ക് കണ്ടെത്തിയത്. 17-കാരൻ ബൈക്ക് ഓടിക്കുന്ന സിസിടിവി ദൃശ്യങ്ങൾ ശേഖരിച്ച അന്വേഷണ സംഘത്തിന്, കുട്ടി ബൈക്ക് ഉപയോഗിക്കാറുണ്ടെന്ന് ഫ്ലാറ്റ് ജീവനക്കാരനും മൊഴി നൽകിയിട്ടുണ്ട്; വാഹനത്തിന്റെ രജിസ്ട്രേഷനിലും പൊലീസ് സംശയം രേഖപ്പെടുത്തുന്നുണ്ട്.
ജഡ്ജിയുടെ വീട്ടിൽ നിന്ന് ആഡംബര ബൈക്കിന് പുറമെ ഡിജിറ്റൽ ഉപകരണങ്ങളും വാഹന രേഖകളും ഫ്ലാറ്റിലെ സിസിടിവി ദൃശ്യങ്ങളും ഉദ്യോഗസ്ഥർ കസ്റ്റഡിയിലെടുത്തു. അപകടം നടന്ന ദിവസം ജോലിയിലുണ്ടായിരുന്ന സെക്യൂരിറ്റി ജീവനക്കാരുടെ മൊഴിയും പ്രത്യേക അന്വേഷണ സംഘം രേഖപ്പെടുത്തിയിട്ടുണ്ട്.
