കണ്ണൂർ: കണ്ണൂർ ജില്ലാ പഞ്ചായത്ത് മുൻ പ്രസിഡന്റ് പി.പി. ദിവ്യക്കെതിരായ വിജിലൻസ് അന്വേഷണ സംഘത്തിൽ നിന്ന് കണ്ണൂർ യൂണിറ്റ് ഇൻസ്പെക്ടർ ബിനു മോഹനെ ഒഴിവാക്കണമെന്ന് ആവശ്യപ്പെട്ട് ആഭ്യന്തര മന്ത്രിക്ക് പരാതി ലഭിച്ചു. കെഎസ്‌യു സംസ്ഥാന വൈസ് പ്രസിഡന്റ് മുഹമ്മദ് ഷമ്മാസാണ് ഇതുസംബന്ധിച്ച് ഔദ്യോഗികമായി പരാതി സമർപ്പിച്ചത്.
നാല് ദിവസം മുമ്പാണ് മുഹമ്മദ് ഷമ്മാസിന്റെ പരാതിയുടെ അടിസ്ഥാനത്തിൽ പി.പി. ദിവ്യക്കെതിരെ വിജിലൻസ് അന്വേഷണം പ്രഖ്യാപിച്ചത്. ഇൻസ്പെക്ടർ ബിനു മോഹന് പി.പി. ദിവ്യയുമായി അടുത്ത സൗഹൃദമുണ്ടെന്നും, അദ്ദേഹത്തിന്റെ സഹോദരൻ ബിജു മോഹൻ 'കാർട്ടൻ ഇന്ത്യ' കമ്പനിയിലെ ഡയറക്ടർമാരിൽ ഒരാളാണെന്നുമാണ് പരാതിയിലെ പ്രധാന ആരോപണം. 2021-ൽ മൂന്ന് പേർ ചേർന്ന് ആരംഭിച്ച ഈ കമ്പനിയിൽ നിലവിൽ മുഹമ്മദ് ആസിഫും ബിജു മോഹനുമാണ് ഡയറക്ടർ ബോർഡിലുള്ളത്.
നവീൻ ബാബുവിന്റെ മരണവുമായി ബന്ധപ്പെട്ട ക്രൈംബ്രാഞ്ച് കുറ്റപത്രത്തിലെ പിഴവുകൾ പരിശോധിക്കാൻ കോടതി നിർദ്ദേശിച്ചപ്പോൾ അന്ന് ടൗൺ സ്റ്റേഷൻ എസ്‌എച്ച്‌ഒ ആയിരുന്ന ബിനു മോഹനെതിരെ കുടുംബം രംഗത്തുവന്നിരുന്നു. അന്ന് ഈ പശ്ചാത്തലത്തിൽ അദ്ദേഹത്തെ മാറ്റിയിരുന്നുവെന്ന കാര്യവും പരാതിയിൽ ചൂണ്ടിക്കാണിച്ചിട്ടുണ്ട്. ഈ സാഹചര്യത്തിൽ നിഷ്പക്ഷമായ അന്വേഷണം ഉറപ്പാക്കാൻ ബിനു മോഹനെ അന്വേഷണ ചുമതലയിൽ നിന്ന് മാറ്റണമെന്നാണ് ആവശ്യം.
