തിരുവനന്തപുരം: കടുത്ത സാമ്പത്തിക ഞെരുക്കത്തിനിടയിലും മന്ത്രിമാരുടെയും പേഴ്സണൽ സ്റ്റാഫുകളുടെയും ഉപയോഗത്തിനായി 6.71 കോടി രൂപ ചെലവിട്ട് 480 ആപ്പിൾ ഐപാഡുകൾ വാങ്ങാൻ സംസ്ഥാന സർക്കാർ നടപടികൾ ആരംഭിച്ചു. ഉപകരണങ്ങൾ വാങ്ങുന്നതിനായി കെൽട്രോൺ ടെൻഡർ ക്ഷണിച്ച വിവരങ്ങൾ പുറത്തുവന്നതോടെ വിഷയം വിവാദമായിട്ടുണ്ട്.

മൂന്ന് വ്യത്യസ്ത മോഡലുകളിലായി 160 എണ്ണം വീതം ഐപാഡുകൾ വാങ്ങാനാണ് ടെൻഡർ പുറപ്പെടുവിച്ചിട്ടുള്ളത്. 13 ഇഞ്ച് ഐപാഡ് പ്രോ, 11 ഇഞ്ച് ഐപാഡ് പ്രോ, 11 ഇഞ്ച് ഐപാഡ് എന്നിവയാണ് പട്ടികയിൽ ഉൾപ്പെട്ടിരിക്കുന്ന വിഭാഗങ്ങൾ.