തിരുവനന്തപുരം: മദ്യലഹരിയിൽ അമിതവേഗതയിൽ വാഹനമോടിച്ച് അപകടമുണ്ടാക്കിയ എക്സൈസ് ഉദ്യോഗസ്ഥനെ സർവീസിൽ നിന്ന് സസ്പെൻഡ് ചെയ്തു. നെയ്യാർഡാം ചെക്പോസ്റ്റിലെ പ്രിവന്റീവ് ഓഫീസറായ ആർ. ഷിജുവിനെതിരെയാണ് എക്സൈസ് കമ്മീഷണർ സാംബശിവ റാവു അച്ചടക്ക നടപടിക്ക് ഉത്തരവിട്ടത്. പരിശോധനയിൽ ഇയാൾ മദ്യപിച്ചിരുന്നതായി സ്ഥിരീകരിച്ചിരുന്നു.
ഒക്ടോബർ 24-നായിരുന്നു കേസിനാസ്പദമായ സംഭവം. കട്ടയ്ക്കോട് ഭാഗത്തുനിന്ന് കാട്ടാക്കടയിലേക്ക് ഷിജു അമിതവേഗത്തിൽ ഓടിച്ചുവന്ന കാർ നിയന്ത്രണം നഷ്ടപ്പെട്ട് മറിയുകയായിരുന്നു; ഇതേസമയം എതിർദിശയിൽ സഞ്ചരിച്ച ബൈക്ക് യാത്രികൻ തലനാരിഴയ്ക്കാണ് രക്ഷപ്പെട്ടത്.
അപകടത്തിന് പിന്നാലെ വാഹനത്തിൽനിന്ന് രക്ഷപ്പെടാൻ ശ്രമിച്ച ഉദ്യോഗസ്ഥനെ നാട്ടുകാരാണ് തടഞ്ഞുവെച്ച് പോലീസിന് കൈമാറിയത്.
