കോഴിക്കോട്: കേരള സ്കൂൾ കായികമേളയിലെ ഭക്ഷണത്തിൽ പുഴു കണ്ടെത്തിയെന്ന തരത്തിലുള്ള ഔദ്യോഗിക പരാതി ഇതുവരെ ലഭിച്ചിട്ടില്ലെന്ന് മന്ത്രി എൻ. ഷംസുദ്ദീൻ വ്യക്തമാക്കി. കായികമേളയെ പ്രോത്സാഹിപ്പിക്കുകയാണ് മാധ്യമങ്ങൾ ചെയ്യേണ്ടതെന്നും നിരന്തരം പരാതികൾ ഉന്നയിക്കുകയല്ല വേണ്ടതെന്നും അദ്ദേഹം അഭിപ്രായപ്പെട്ടു.
കഴിഞ്ഞദിവസം ഭക്ഷണക്രമത്തിലടക്കം സംഭവിച്ച ചെറിയ വീഴ്ചകൾ പൂർണ്ണമായും പരിഹരിച്ചതായി മന്ത്രി അറിയിച്ചു. ഇതിന്റെ ഭാഗമായി ഇന്ന് രണ്ടായിരത്തിലധികം പേർക്ക് അധിക സൗകര്യങ്ങൾ ഒരുക്കുമെന്നും, ഭക്ഷണശാലയ്ക്ക് പുറത്ത് തണൽ ഒരുക്കാനുള്ള സംവിധാനങ്ങൾ സജ്ജമാക്കുന്നുണ്ടെന്നും അദ്ദേഹം വ്യക്തമാക്കി.
മാധ്യമപ്രവർത്തകർക്കുണ്ടായ ബുദ്ധിമുട്ടുകളിൽ ഖേദം പ്രകടിപ്പിച്ച അദ്ദേഹം, കാർഡ് ഉപയോഗിച്ച് ഭക്ഷണം കഴിക്കാനുള്ള പുതിയ സംവിധാനവും വെളിച്ചക്കുറവ് പരിഹരിക്കാൻ ലൈറ്റിംഗ് ക്രമീകരണങ്ങളും ഏർപ്പെടുത്തിയതായി കൂട്ടിച്ചേർത്തു. വലിയ രീതിയിലുള്ള ഒരു കായികമേള സംഘടിപ്പിക്കുമ്പോൾ സ്വാഭാവികമായി ഉണ്ടാകാവുന്ന ചെറിയ പോരായ്മകൾ നേരിട്ട് കണ്ട് നിയന്ത്രിക്കുന്നുണ്ടെന്നും, സംഘാടനം കുറ്റമറ്റ രീതിയിൽ മുന്നോട്ട് പോകുന്നുവെന്നും മന്ത്രി വ്യക്തമാക്കി.
