തിരുവനന്തപുരം: രോഗികൾക്ക് അനാവശ്യമായി ആൻജിയോപ്ലാസ്റ്റി നടത്തുന്ന സാഹചര്യം ശ്രദ്ധയിൽപ്പെട്ടിട്ടില്ലെന്ന് വ്യക്തമാക്കി ആരോഗ്യമന്ത്രി കെ. മുരളീധരൻ നിയമസഭയിൽ രേഖാമൂലം മറുപടി നൽകി. മുഖ്യമന്ത്രി വി.ഡി. സതീശൻ നേരത്തെ ആൻജിയോപ്ലാസ്റ്റിയുമായി ബന്ധപ്പെട്ട് ഉന്നയിച്ച വിവാദ പ്രസ്താവനകളെ പൂർണ്ണമായും തള്ളുന്നതാണ് ആരോഗ്യമന്ത്രിയുടെ ഈ വിശദീകരണം.
എംഎൽഎമാരായ പി.പി. സുമോദ്, വി.കെ. സനോജ്, സി.കെ. ഹരീന്ദ്രൻ, കെ. പ്രേമൻ എന്നിവരുടെ നക്ഷത്രചിഹ്നമിടാത്ത ചോദ്യങ്ങൾക്ക് മറുപടി നൽകുകയായിരുന്നു മന്ത്രി. രോഗികളിൽ അനാവശ്യമായി ആൻജിയോപ്ലാസ്റ്റി ചെയ്യുന്ന ആക്ഷേപങ്ങൾ നിലനിൽക്കുന്നുണ്ടോ, ഏതൊക്കെ ആശുപത്രികളിലാണ് ഇത് നടക്കുന്നത്, ഇത്തരം പ്രവണതകൾ തടയാൻ വകുപ്പ് എന്തെങ്കിലും നിർദ്ദേശങ്ങൾ നൽകിയിട്ടുണ്ടോ തുടങ്ങിയ ചോദ്യങ്ങൾക്കാണ് അങ്ങനെ ഒരു സാഹചര്യം വകുപ്പിന്റെ ശ്രദ്ധയിൽപ്പെട്ടിട്ടില്ലെന്ന് മന്ത്രി വ്യക്തമാക്കിയത്.
അതേസമയം, ആൻജിയോപ്ലാസ്റ്റിയുടെ പേരിൽ സ്വകാര്യ ആശുപത്രികൾ രോഗികളെ ചൂഷണം ചെയ്ത് അമിത ചാർജ് ഈടാക്കുന്നതുമായി ബന്ധപ്പെട്ട് ചില പരാതികൾ ലഭിച്ചിട്ടുണ്ടെന്ന് മന്ത്രി സഭയെ അറിയിച്ചു. സ്വകാര്യ ആശുപത്രികളിലെ ഇത്തരം ചികിത്സാ ചൂഷണങ്ങളെക്കുറിച്ച് അന്വേഷണം നടത്താൻ പ്രിൻസിപ്പൽ സെക്രട്ടറി അധ്യക്ഷനായി പ്രത്യേക സമിതി രൂപീകരിച്ചിട്ടുണ്ടെന്നും അദ്ദേഹം വ്യക്തമാക്കി.
