കൊച്ചി: അനധികൃത സ്വത്ത് സമ്പാദനക്കേസിൽ കോട്ടയം വിജിലൻസ് കോടതി നാല് വർഷം തടവിനും 30.84 ലക്ഷം രൂപ പിഴയ്ക്കും ശിക്ഷിച്ച മുൻ ഡിജിപി ടോമിൻ ജെ. തച്ചങ്കരിയുടെ ശിക്ഷാവിധി ഹൈക്കോടതി മരവിപ്പിച്ചു. സമർപ്പിച്ച അപ്പീൽ ഹർജിയിൽ അന്തിമ തീരുമാനം ഉണ്ടാകുന്നതുവരെ ശിക്ഷ നടപ്പാക്കുന്നത് തടയണമെന്ന അദ്ദേഹത്തിന്റെ ഇടക്കാല ആവശ്യം കോടതി അംഗീകരിച്ചതോടെ തച്ചങ്കരിക്ക് ജയിലിൽ നിന്ന് പുറത്തിറങ്ങാം.
2003 മുതൽ 2007 വരെയുള്ള കാലഘട്ടത്തിൽ ഔദ്യോഗിക പദവിയിലിരിക്കെ വരുമാനത്തിൽ കവിഞ്ഞ് സ്വത്ത് സമ്പാദിച്ചുവെന്ന കേസിലാണ് വിജിലൻസ് കോടതി മുൻപ് ശിക്ഷ വിധിച്ചത്.
എന്നാൽ, ആരോപിക്കപ്പെടുന്ന സ്വത്തുക്കൾ മാതാവ് വഴി ലഭിച്ചതാണെന്ന തന്റെ വിശദീകരണം വിചാരണ വേളയിൽ വിജിലൻസ് കോടതി പരിഗണിച്ചില്ലെന്നാണ് ഹൈക്കോടതിയിൽ നൽകിയ അപ്പീലിൽ ടോമിൻ ജെ. തച്ചങ്കരിയുടെ പ്രധാന വാദം.
