തിരുവനന്തപുരം: ബിജെപി വൈസ് പ്രസിഡന്റ് ആർ. ശ്രീലേഖയുടെ വിവാദ പരാമർശങ്ങൾ പാർട്ടിയുടെ ഔദ്യോഗിക നിലപാടല്ലെന്നും വലിയൊരു പ്രസ്ഥാനത്തിൽ പലരും സ്വന്തം അഭിപ്രായങ്ങൾ പ്രകടിപ്പിച്ചേക്കാമെന്നും വി. മുരളീധരൻ എംഎൽഎ. അതേസമയം, മാസപ്പടി കേസിൽ പിണറായി വിജയന്റെ അപ്പീൽ തള്ളിയ കോടതി വിധിയിലൂടെ ഇന്ത്യ മുന്നണിയിലെ പാർട്ടികളുടെ ഒത്തുകളിയാണ് പുറത്തുവന്നതെന്ന് അദ്ദേഹം ആരോപിച്ചു.
കേസിൽ ഇഡി കൃത്യമായ തെളിവുകളും രേഖകളും ഹാജരാക്കിയിട്ടും സർക്കാർ പ്രതികൾക്കൊപ്പമാണോ നിൽക്കുന്നതെന്നും അന്വേഷണത്തോട് എന്തിനാണ് മടികാണിക്കുന്നതെന്നും അദ്ദേഹം ചോദിച്ചു. ജനങ്ങൾക്ക് ആഭ്യന്തരമന്ത്രിയിലുള്ള വിശ്വാസ്യത നഷ്ടപ്പെട്ട സാഹചര്യത്തിൽ രമേശ് ചെന്നിത്തലയ്ക്ക് സ്ഥാനത്ത് തുടരാൻ എന്ത് ധാർമികതയാണുള്ളതെന്നും, പിണറായി വിജയൻ പ്രതിപക്ഷ നേതൃസ്ഥാനത്ത് തുടരുന്നത് പ്രതിപക്ഷത്തിന് അപമാനമായതിനാൽ സ്ഥാനം ഒഴിഞ്ഞുനൽകണമെന്നും മുരളീധരൻ ആവശ്യപ്പെട്ടു.
ശ്രീലേഖയുടെ പ്രസ്താവന സംബന്ധിച്ച ചോദ്യങ്ങളിൽ നിന്ന് ഒഴിഞ്ഞുമാറിയ അദ്ദേഹം, നിയമസഭയിൽ ബിജെപിക്ക് സംസാരിക്കാൻ അനുമതി ലഭിക്കുന്നില്ലെന്ന പരാതി സ്പീക്കറുടെ ശ്രദ്ധയിൽപ്പെടുത്തിയിട്ടുണ്ടെന്നും വ്യക്തമാക്കി.
