കൊച്ചി: ഇ.എൻ. സുരേഷ് ബാബുവിനെതിരെ കർശനമായ നിയമനടപടികൾ സ്വീകരിക്കണമെന്ന് കോൺഗ്രസ് നേതാവ് ദീപ്തി മേരി വർഗീസ് ആവശ്യപ്പെട്ടു. വിഷയത്തിൽ സംസ്ഥാന ആഭ്യന്തര വകുപ്പിന്റെ അടിയന്തര ഇടപെടൽ ആവശ്യമാണ്; അല്ലാത്തപക്ഷം അത് സിപിഐഎമ്മിന്റെ പൂർണ്ണ പരാജയമായി മാറും. പ്രതിപക്ഷ നേതാവ് സ്ത്രീസമൂഹത്തിന് എന്ത് സന്ദേശമാണ് ഇതിലൂടെ നൽകുന്നതെന്നും, പാർട്ടി നേതാക്കൾ ഉൾപ്പെടുന്ന പരാതികൾ ഒതുക്കിത്തീർക്കുന്ന പതിവുശൈലിയാണ് ഇവിടെയും തുടരുന്നതെന്നും അവർ വിമർശിച്ചു.
രാഹുൽ മാങ്കൂട്ടത്തിലിനെതിരെ പരാതി ഇമെയിലിൽ ലഭിച്ച ഉടൻതന്നെ കെപിസിസി നേതൃത്വം അത് ഡിജിപിക്ക് കൈമാറാൻ സന്നദ്ധത കാട്ടി. സമാനമായി സുരേഷ് ബാബുവിനെതിരെയും ഉടനടി കേസ് രജിസ്റ്റർ ചെയ്യണം. സുരേഷ് ബാബുവിനെതിരെ പോലീസിലോ അല്ലെങ്കിൽ കോടതിയിലോ പരാതി നൽകാൻ പ്രതിപക്ഷ നേതാവ് മുന്നോട്ടുവരണമെന്ന് ദീപ്തി മേരി വർഗീസ് ആവശ്യപ്പെട്ടു.
വനിതാ പോലീസ് ഉദ്യോഗസ്ഥരോട് അപമര്യാദയായി പെരുമാറിയെന്ന പരാതി മുൻപ് പി. ശശിക്കെതിരെയും ഉയർന്നുവന്നിട്ടുണ്ട്; കൊച്ചി ഡിസിപിയുടെ അധികാര പരിധിയിലാണ് ഈ കേസ് വരുന്നത്. ആ അന്വേഷണം ശക്തമായി മുന്നോട്ടുകൊണ്ടുപോകണമെന്നും പി. ശശിയുടെ ഫോൺ പരിശോധനയ്ക്ക് വിധേയമാക്കണമെന്നും അവർ ആവശ്യപ്പെട്ടു. ജെബി മേത്തർക്കെതിരെ നടക്കുന്ന സൈബർ അതിക്രമങ്ങളിൽ കുറ്റക്കാർക്കെതിരെ നടപടിയെടുക്കുമ്പോൾ പാർട്ടി നോക്കേണ്ടതില്ല. കേവലം ഊഹാപോഹങ്ങളുടെ പുറത്ത് നടപടി സാധ്യമല്ലെന്നും, വസ്തുതകൾ കൃത്യമായി അന്വേഷിക്കപ്പെടണമെന്നും, അതിൽ രാഷ്ട്രീയം നോക്കേണ്ടതില്ലെന്നും ദീപ്തി വ്യക്തമാക്കി.
