പാലക്കാട്: സിപിഐഎം പാലക്കാട് ജില്ലാ സെക്രട്ടറി പദവിയിൽ നിന്ന് നീക്കം ചെയ്ത ഇ.എൻ. സുരേഷ് ബാബുവിനെതിരെ മുൻകാലങ്ങളിലും സമാനമായ പരാതികൾ ഉയർന്നിരുന്നതായി വിവരങ്ങൾ. ജോലി വാഗ്ദാനം നൽകി യുവതിയോട് അപമര്യാദയായി പെരുമാറിയെന്ന പരാതി മുൻപ് ഒത്തുതീർപ്പാക്കുകയാണുണ്ടായതെന്നാണ് പുറത്തുവരുന്ന സൂചനകൾ. പാലക്കാട്ടെ പാർട്ടി ആസ്ഥാനം നവീകരിച്ചതുമായി ബന്ധപ്പെട്ടതടക്കം ഒട്ടേറെ സാമ്പത്തിക അഴിമതി ആരോപണങ്ങളും സുരേഷ് ബാബുവിനെതിരെ ഇതിനകം ഉയർന്നിരുന്നു. ഇത്തരം ആക്ഷേപങ്ങളുടെ പശ്ചാത്തലത്തിൽ കൂടിയാണ് നേതൃത്വം അദ്ദേഹത്തെ പദവിയിൽ നിന്ന് ഒഴിവാക്കിയത്.
പിണറായി വിജയന്റെ നേരിട്ടുള്ള ഇടപെടലിനെ തുടർന്നാണ് ജില്ലാ സെക്രട്ടറി സ്ഥാനത്ത് നിന്ന് സുരേഷ് ബാബുവിനെ നീക്കിയതെന്നാണ് അറിയാൻ കഴിയുന്നത്. സുരേഷ് ബാബുവിനെ മലപ്പുറത്തേക്ക് നേരിട്ട് വിളിപ്പിച്ച ശേഷം അദ്ദേഹത്തിനെതിരായ പരാതി വായിച്ചു കേൾപ്പിക്കുകയായിരുന്നു. തുടർന്ന് സെക്രട്ടറി സ്ഥാനമൊഴിയാൻ അദ്ദേഹത്തോട് നിർദ്ദേശിച്ചു. എന്നാൽ യുവതിയുടെ പരാതിയെ തുടർന്നാണ് തന്നെ മാറ്റിയതെന്ന വിവരം പരസ്യമാകരുതെന്ന് സുരേഷ് ബാബു നേതൃത്വത്തോട് അഭ്യർത്ഥിച്ചതായാണ് ലഭിക്കുന്ന വിവരം.
അതേസമയം, ഇ.എൻ. സുരേഷ് ബാബുവിനെ മാറ്റിയത് സംഘടനാപരമായ അച്ചടക്ക നടപടിയുടെ ഭാഗമാണെന്ന് സംസ്ഥാന സെക്രട്ടേറിയറ്റ് അംഗം വി. ശിവൻകുട്ടി സ്ഥിരീകരിച്ചു. എന്നാൽ പാർട്ടിയിലെ നവീകരണ പ്രക്രിയകളുടെ ഭാഗമായാണ് ജില്ലാ സെക്രട്ടറിയെ മാറ്റിയതെന്നായിരുന്നു സിപിഐഎം സംസ്ഥാന സെക്രട്ടറി എം.വി. ഗോവിന്ദൻ പ്രതികരിച്ചത്.
എന്നാൽ സുരേഷ് ബാബുവിനെതിരെ അത്തരം പരാതികളൊന്നും ലഭിച്ചിട്ടില്ലെന്നാണ് പുതിയ ജില്ലാ സെക്രട്ടറിയായി ചുമതലയേറ്റ വി. ചെന്താമരാക്ഷന്റെ വിശദീകരണം. വനിതാ അഭിഭാഷകയോട് മോശമായി പെരുമാറിയെന്ന പരാതി ഉയർന്ന സാഹചര്യത്തിൽ, സ്ഥാനചലനത്തിന് പിന്നാലെ ഇ.എൻ. സുരേഷ് ബാബുവിനെതിരെ കൂടുതൽ കർശന നടപടികൾ ഉണ്ടായേക്കുമെന്നാണ് വിലയിരുത്തൽ.
