തിരുവനന്തപുരം: കൗൺസിലർ പദവി രാജിവെച്ച മുതിർന്ന നേതാവ് ആർ. ശ്രീലേഖയെ അനുനയിപ്പിക്കാനുള്ള തീവ്രശ്രമങ്ങളുമായി ബിജെപി നേതൃത്വം രംഗത്ത്. ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖർ ശ്രീലേഖയുമായി ടെലിഫോണിൽ ആശയവിനിമയം നടത്തി. തുടർന്ന് കാര്യങ്ങൾ നേരിൽക്കണ്ട് ചർച്ച ചെയ്യാൻ ധാരണയാവുകയും തിങ്കളാഴ്ച ഇരുവരും തമ്മിൽ കൂടിക്കാഴ്ച നടത്താൻ തീരുമാനിക്കുകയും ചെയ്തു. തികച്ചും സ്വകാര്യ കാരണങ്ങൾ നിരത്തിയാണ് ശ്രീലേഖ മേയർക്ക് രാജിക്കത്ത് കൈമാറിയത്. എങ്കിലും, ചട്ടപ്രകാരം രാജി ഔദ്യോഗികമായി സമർപ്പിക്കേണ്ടത് കോർപ്പറേഷൻ സെക്രട്ടറിക്കാണ്. കത്ത് തനിക്ക് ലഭിച്ചതായി മേയർ സ്ഥിരീകരിച്ചുവെങ്കിലും, ഇത്തരമൊരു ഔദ്യോഗിക അറിയിപ്പ് ഇതുവരെ കൈപ്പറ്റിയിട്ടില്ലെന്നാണ് നഗരസഭാ സെക്രട്ടറി വ്യക്തമാക്കിയത്.
കേവല ഭൂരിപക്ഷത്തിന് 51 പേരുടെ പിന്തുണ ആവശ്യമുള്ള തിരുവനന്തപുരം നഗരസഭയിൽ, ശാസ്തമംഗലം വാർഡ് കൗൺസിലറായ ആർ. ശ്രീലേഖയുടെ രാജി പ്രാബല്യത്തിലാകുന്നതോടെ ബിജെപിയുടെ കക്ഷിനില 49 ആയി ചുരുങ്ങും. തെരഞ്ഞെടുപ്പ് വേളയിൽ തന്നെ മേയർ സ്ഥാനാർത്ഥിയായി ഉയർത്തിക്കാട്ടിയ ശേഷം ഭരണത്തിലേറിയപ്പോൾ ഒഴിവാക്കിയതിലടക്കം നേരത്തെ തന്നെ ശ്രീലേഖ തന്റെ കടുത്ത അതൃപ്തി വ്യക്തമാക്കിയിരുന്നു.
അതേസമയം, ദേശീയ വനിതാ കമ്മീഷൻ അംഗമായി തന്നെ പരിഗണിക്കാതിരുന്നതാണ് പെട്ടെന്നുള്ള രാജിക്ക് കാരണമെന്നും സൂചനകളുണ്ട്. ഈ പദവിയിലേക്ക് നിവേദിത സുബ്രഹ്മണ്യത്തെയാണ് നേതൃത്വം നിശ്ചയിച്ചത്. ഏതെങ്കിലും സുപ്രധാന സ്ഥാനം നൽകുമെന്ന് ബിജെപി നേതൃത്വം ഉറപ്പുനൽകിയിരുന്നുവെന്നും, പാർട്ടി നേതാക്കൾ വാക്കുപാലിക്കാത്തതിലുള്ള കടുത്ത പ്രതിഷേധത്തിന്റെ ഭാഗമായാണ് ഈ രാജിയെന്നുമാണ് പുറത്തുവരുന്ന വിവരങ്ങൾ.
