തൃശ്ശൂർ: ഭർത്താവിന്റെ പെൺസുഹൃത്തിനെ ലൈംഗികമായി പീഡിപ്പിക്കുന്നതിനായി ഭാര്യ ഗുണ്ടാസംഘത്തിന് ക്വട്ടേഷൻ നൽകിയതായി ഞെട്ടിക്കുന്ന വിവരം പുറത്ത്. തൃശ്ശൂരിലെ ഒമേഗ ലോഡ്ജ് കേന്ദ്രീകരിച്ചാണ് അത്യന്തം ക്രൂരമായ സംഭവം അരങ്ങേറിയത്. പോലീസ് ഉദ്യോഗസ്ഥരെന്ന വ്യാജേനയെത്തിയ ക്വട്ടേഷൻ സംഘം യുവതിയെ കടത്തിക്കൊണ്ടുപോയി കൂട്ടബലാത്സംഗത്തിന് ഇരയാക്കുകയായിരുന്നുവെന്നാണ് പരാതി. യുവതിക്കൊപ്പം ലോഡ്ജിലുണ്ടായിരുന്ന പുരുഷ സുഹൃത്തിനെ ക്രൂരമായി മർദ്ദിച്ച് കൈകാലുകൾ തല്ലിയൊടിച്ച ശേഷം തമിഴ്നാട്ടിലെ ഒരു ആശുപത്രിയിൽ ഉപേക്ഷിക്കുകയും ചെയ്തു.
കേസിൽ ക്വട്ടേഷൻ നടപ്പിലാക്കിയ അഞ്ചംഗ ഗുണ്ടാ സംഘത്തെ തൃശ്ശൂർ സിറ്റി പോലീസ് കസ്റ്റഡിയിലെടുത്തു. അഞ്ച് ദിവസം മുൻപായിരുന്നു കേസിനാസ്പദമായ സംഭവം നടന്നത്. തിരുപ്പൂർ സ്വദേശിനിയായ യുവതിയും സുഹൃത്തും അഞ്ച് ദിവസങ്ങൾക്ക് മുൻപാണ് ലോഡ്ജിൽ മുറിയെടുത്തത്. യുവതിയുടെ മൊബൈൽ ഫോൺ ലൊക്കേഷൻ പിന്തുടർന്ന് ലോഡ്ജിലെത്തിയ ക്വട്ടേഷൻ സംഘം യുവതിയെ ലൈംഗികാതിക്രമത്തിന് ഇരയാക്കുകയാണുണ്ടായത്. ഇത് തടയാൻ ശ്രമിച്ചപ്പോഴാണ് കൂടെയുണ്ടായിരുന്ന യുവാവിനെ സംഘം അതിക്രൂരമായി ആക്രമിച്ചത്.
നിലമ്പൂരിൽ ജോലി ചെയ്തുവരികയായിരുന്ന യുവതി സംഭവം സംബന്ധിച്ച് ആദ്യം നിലമ്പൂർ പോലീസ് സ്റ്റേഷനിലാണ് പരാതി നൽകിയത്. പരാതി ലഭിച്ചയുടൻ നടത്തിയ പ്രാഥമിക അന്വേഷണത്തിൽ മൂന്ന് പ്രതികളെ പോലീസ് പിടികൂടി. പിന്നീട് നടത്തിയ തിരച്ചിലിൽ രണ്ട് പേർ കൂടി വലയിലായി. കേസിൽ ഉൾപ്പെട്ട ഒരാളെക്കൂടി ഇനി പിടികൂടാനുണ്ടെന്ന് പോലീസ് അറിയിച്ചു.
