തിരുവനന്തപുരം: കോടിയേരി ബാലകൃഷ്ണന്റെ നാലാം ചരമവാർഷിക ദിനത്തിൽ സിപിഐഎം നേതൃത്വത്തിനെതിരെ പരോക്ഷ വിമർശനവുമായി മകൻ ബിനീഷ് കോടിയേരി രംഗത്ത്. നിയമപരമായ കേസുകൾ ഉയർന്നുവന്ന ഘട്ടങ്ങളിലൊന്നും പാർട്ടിയെ ഒരു പരിചയാക്കി മാറ്റാൻ ശ്രമിക്കാത്ത നേതാവായിരുന്നു കോടിയേരിയെന്ന് ബിനീഷ് ചൂണ്ടിക്കാട്ടി. ഏത് പ്രതിസന്ധിയും സ്വന്തം നിലയിൽത്തന്നെ നേരിടണമെന്ന കർശന നിലപാടുകാരനായിരുന്നു അദ്ദേഹം. കേസുകൾ ഒന്നിന് പുറകെ ഒന്നായി വേട്ടയാടിയപ്പോഴും പുഞ്ചിരിയോടെയായിരുന്നു അദ്ദേഹം അവയെല്ലാം നേരിട്ടത്. ആർഎസ്എസിന് മുന്നിൽ മുട്ടുമടക്കിക്കൊണ്ടുള്ള ഒരു സമാധാന അന്തരീക്ഷമോ ഒത്തുതീർപ്പോ അദ്ദേഹം ഒരുകാലത്തും ആഗ്രഹിച്ചിരുന്നില്ലെന്നും ബിനീഷ് കോടിയേരി ഫേസ്ബുക്ക് കുറിപ്പിൽ വ്യക്തമാക്കി.
സിപിഐഎമ്മിന്റെ മുൻ സംസ്ഥാന സെക്രട്ടറിയായിരുന്ന കോടിയേരി ബാലകൃഷ്ണൻ വിടപറഞ്ഞിട്ട് ഇന്നേക്ക് നാല് ആണ്ട് പൂർത്തിയാവുകയാണ്. കണ്ണൂരിൽ നടക്കുന്ന കോടിയേരി അനുസ്മരണ ചടങ്ങുകളിൽ നിന്ന് പ്രതിപക്ഷ നേതാവ് പിണറായി വിജയനും പാർട്ടി സംസ്ഥാന സെക്രട്ടറി എം.വി. ഗോവിന്ദനും വിട്ടുനിൽക്കുന്നതിൽ അദ്ദേഹത്തിന്റെ കുടുംബം കടുത്ത അതൃപ്തി അറിയിച്ചു. പയ്യാമ്പലത്ത് നടക്കുന്ന പുഷ്പാർച്ചനയിലും ഇരുവരും സാന്നിധ്യമറിയിക്കില്ല. കഴിഞ്ഞ മൂന്ന് വാർഷികങ്ങളിലും ഇരുവരും കോടിയേരിയുടെ വസതിയിൽ നേരിട്ടെത്തിയിരുന്നു. എന്നാൽ പാർട്ടിയുടെ വിപുലമായ ജില്ലാ സമിതി യോഗങ്ങളിൽ പങ്കെടുക്കേണ്ടതുകൊണ്ടാണ് ഇത്തവണ കണ്ണൂരിലെ പരിപാടികളിൽ എത്താൻ സാധിക്കാത്തതെന്നാണ് ഇതിന് നൽകിയിരിക്കുന്ന ഔദ്യോഗിക വിശദീകരണം.
