തിരുവനന്തപുരം: തലസ്ഥാനത്തെ യൂണിവേഴ്സിറ്റി കോളേജ് ഹോസ്റ്റൽ പരിസരത്തുണ്ടായ അക്രമസംഭവങ്ങളിൽ എസ്എഫ്ഐയെ രൂക്ഷമായി വിമർശിച്ച് അബിൻ വർക്കി എംഎൽഎ. യൂത്ത് കോൺഗ്രസ് പൂർണ്ണമായും സമാധാനപരമായ രീതിയിലാണ് പ്രതിഷേധം ആരംഭിച്ചതെന്നും, പ്രകടനം യൂണിവേഴ്സിറ്റി ഹോസ്റ്റലിന് സമീപമെത്തിയപ്പോൾ കെട്ടിടത്തിനുള്ളിൽ നിന്ന് അങ്ങോട്ട് കല്ലേറുണ്ടാകുകയാണുണ്ടായതെന്നും അദ്ദേഹം മാധ്യമങ്ങളോട് വ്യക്തമാക്കി.
ഹോസ്റ്റലിനകത്തുനിന്ന് ബിയർ കുപ്പികൾ വലിച്ചെറിഞ്ഞെന്നും, യൂണിവേഴ്സിറ്റി കോളേജ് വളപ്പിൽ നിന്ന് കല്ലേറുണ്ടായെന്നും അബിൻ വർക്കി ആരോപിച്ചു. ഗ്യാനേഷ് കുമാറിനെതിരെ നടത്തുന്ന സമരത്തിൽ എസ്എഫ്ഐക്ക് എന്തിനാണ് ഇത്രയധികം അസഹിഷ്ണുതയെന്ന് അദ്ദേഹം ആരാഞ്ഞു. ഇത് കെ.ബി. ഗണേഷ് കുമാറിനെതിരെയല്ല, മറിച്ച് മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരായ പ്രക്ഷോഭമാണെന്ന കാര്യം എസ്എഫ്ഐ പ്രവർത്തകർ തിരിച്ചറിയണം. കേന്ദ്ര ഭരണകൂടത്തിനെതിരെ പ്രതിഷേധം ഉയർത്തുമ്പോൾ ഇവർക്ക് എന്തിനാണ് ഇത്രയധികം വേദനിക്കുന്നതെന്നും അദ്ദേഹം ചോദിച്ചു.
യൂത്ത് കോൺഗ്രസ് പ്രവർത്തകരും യൂണിവേഴ്സിറ്റി കോളേജ് വിദ്യാർത്ഥികളും തമ്മിലുണ്ടായ കയ്യാങ്കളി തലസ്ഥാന നഗരിയെ അക്ഷരാർത്ഥത്തിൽ തെരുവ് യുദ്ധത്തിന് സമാനമായ അന്തരീക്ഷത്തിലേക്കാണ് നയിച്ചത്. യൂത്ത് കോൺഗ്രസ് സംഘടിപ്പിച്ച 'റെസിസ്റ്റൻസ് മാർച്ചി'നിടെയായിരുന്നു അനിഷ്ട സംഭവങ്ങൾ. മാർച്ചിന് നേരെ ഹോസ്റ്റലിൽ നിന്ന് കല്ലും കുപ്പികളും എറിഞ്ഞതാണ് സംഘർഷത്തിന് തുടക്കമിട്ടതെന്ന് യൂത്ത് കോൺഗ്രസ് കുറ്റപ്പെടുത്തുമ്പോൾ, യൂത്ത് കോൺഗ്രസ് പ്രവർത്തകരാണ് മനഃപൂർവ്വം പ്രകോപനം ഉണ്ടാക്കിയതെന്നാണ് ഹോസ്റ്റൽ വിദ്യാർത്ഥികളുടെ വാദം.
തുടർന്ന് കാമ്പസിനകത്തേക്ക് അതിക്രമിച്ചു കയറിയ യൂത്ത് കോൺഗ്രസുകാർ അവിടെ സ്ഥാപിച്ചിരുന്ന ബോർഡുകളും കൊടിതോരണങ്ങളും അടിച്ചുതകർത്തു. ഇതോടെ സംഘർഷാവസ്ഥ കൂടുതൽ വഷളാവുകയും, രംഗം ശാന്തമാക്കാൻ യൂണിവേഴ്സിറ്റി ഹോസ്റ്റലിൽ പ്രവേശിച്ച പോലീസ് വിദ്യാർത്ഥികൾക്ക് നേരെ ലാത്തിച്ചാർജ്ജ് നടത്തുകയുമുണ്ടായി.
