തിരുവനന്തപുരം: മന്ത്രി കെ.എം. ഷാജിയുടെ ഔദ്യോഗിക കാർ വഴിയിൽ തടഞ്ഞ സംഭവത്തിൽ യുവമോർച്ച പ്രവർത്തകർക്കെതിരെ പോലീസ് കേസ് രജിസ്റ്റർ ചെയ്തു. കന്റോൺമെന്റ് പോലീസാണ് സംഭവത്തിൽ സ്വമേധയാ കേസെടുത്തത്.
കഴിഞ്ഞ ദിവസമായിരുന്നു തലസ്ഥാനത്തെ വാൻറോസ് ജംഗ്ഷൻ പരിസരത്ത് വെച്ച് യുവമോർച്ച പ്രവർത്തകർ മന്ത്രിയുടെ വാഹനം തടസ്സപ്പെടുത്തിയത്. വാഹനം മുന്നോട്ടുപോകാൻ കഴിയാതെ വന്നതോടെ മന്ത്രി ഒരു ഓട്ടോറിക്ഷയിൽ കയറി യാത്ര തുടരാൻ ശ്രമിച്ചു. എന്നാൽ പ്രതിഷേധക്കാർ ഓട്ടോറിക്ഷയും തടഞ്ഞുവെച്ചതിനെത്തുടർന്ന് അദ്ദേഹത്തിന് കാൽനടയായി പോകേണ്ടി വന്നു. കൊല്ലത്ത് വെച്ച് കേന്ദ്ര ആഭ്യന്തര മന്ത്രി അമിത് ഷായ്ക്ക് നേരെ യൂത്ത് കോൺഗ്രസ് പ്രവർത്തകർ കരിങ്കൊടി കാട്ടിയതിനെത്തുടർന്ന് സംസ്ഥാനത്തെ മുഖ്യമന്ത്രി ഉൾപ്പെടെയുള്ള മന്ത്രിമാർക്കെതിരെ യുവമോർച്ച വ്യാപകമായ കരിങ്കൊടി പ്രതിഷേധങ്ങൾ നടത്തിവരികയാണ്.
ഇതിനിടെ, തലസ്ഥാനത്തെ ഡിസിസി ഓഫീസ് ആക്രമിക്കപ്പെട്ട സംഭവത്തിന് പിന്നിൽ ബിജെപിയാണെന്ന് കോൺഗ്രസ് ആരോപിച്ചിരുന്നു. ഇതിന് പിന്നാലെ ബിജെപി ദേശീയ നിർവ്വാഹക സമിതി അംഗം പി.കെ. കൃഷ്ണദാസിനെ കോൺഗ്രസ് പ്രവർത്തകർ വഴിയിൽ തടയുന്ന സാഹചര്യവുമുണ്ടായി. കൃഷ്ണദാസിനെ തടഞ്ഞതിൽ പ്രതിഷേധിച്ച് വ്യാഴാഴ്ച സംസ്ഥാനവ്യാപകമായി പ്രതിഷേധ ദിനം ആചരിക്കാൻ ബിജെപി ആഹ്വാനം ചെയ്തിട്ടുണ്ട്.
