കൊച്ചി: മുഖ്യമന്ത്രി വി.ഡി. സതീശൻ സംസ്ഥാനത്തെ അടിയന്തരാവസ്ഥ സമാനമായ സാഹചര്യത്തിലേക്കാണ് നയിക്കുന്നതെന്ന് മുൻ മന്ത്രിയും സിപിഐഎം കേന്ദ്ര കമ്മിറ്റി അംഗവുമായ പി. രാജീവ്. അടിയന്തരാവസ്ഥയുടെ നാളുകളിൽ വാർത്തകൾക്ക് സെൻസർഷിപ്പ് ഏർപ്പെടുത്തിയത് പോലീസായിരുന്നു. അതിനെ അനുസ്മരിപ്പിക്കുന്ന രീതിയിലാണ് ഇപ്പോൾ സേനയുടെ ഇടപെടലുകൾ. ഇന്നലെ പോലീസിനെ ഉപയോഗിച്ച് മാധ്യമപ്രവർത്തകരെ തടഞ്ഞ മുഖ്യമന്ത്രി, ഇന്ന് മുഖ്യമന്ത്രി മാധ്യമങ്ങളെ കാണുന്നുണ്ടോ ഇല്ലയോ എന്ന് പോലീസ് നേരിട്ടെത്തി വിശദീകരിക്കുന്ന അവസ്ഥയുണ്ടാക്കിയെന്നും പി. രാജീവ് കുറ്റപ്പെടുത്തി.
മാധ്യമങ്ങളെ കാണണമോ വേണ്ടയോ എന്നത് മുഖ്യമന്ത്രിയുടെ വ്യക്തിപരമായ തീരുമാനമാണ്; മറിച്ച് അത് നിശ്ചയിക്കേണ്ട ചുമതല പോലീസിനല്ല. മാധ്യമങ്ങളോട് തികച്ചും മോശമായ സമീപനമാണ് സ്വീകരിക്കുന്നത്. മാധ്യമങ്ങൾ ഉയർത്തുന്ന സുപ്രധാന ചോദ്യങ്ങൾക്ക് മുഖ്യമന്ത്രിക്ക് ഇതുവരെ കൃത്യമായ മറുപടിയില്ല. സ്പോൺസർ ആരായിരുന്നാലും അത്തരം ആനുകൂല്യങ്ങളും സൗകര്യങ്ങളും സ്വീകരിക്കാൻ പാടില്ലായിരുന്നു. പ്രതിപക്ഷ നേതാവായിരുന്ന കാലത്ത് കേരളത്തിലുടനീളം ഓടിനടന്ന് പ്രവർത്തിച്ച ആളാണെന്നാണ് മുഖ്യമന്ത്രി ഇപ്പോൾ അവകാശപ്പെടുന്നത്; അക്കാലത്തൊന്നും സുഹൃത്തുക്കൾക്ക് അദ്ദേഹത്തിന്റെ ആരോഗ്യസ്ഥിതിയെക്കുറിച്ച് ആശങ്കയുണ്ടായില്ലേയെന്ന് രാജീവ് ചോദിച്ചു. ഈ സ്പോൺസർഷിപ്പ് വ്യക്തിപരമായി വി.ഡി. സതീശനുള്ളതല്ല, മറിച്ച് മുഖ്യമന്ത്രി എന്ന ഔദ്യോഗിക പദവിക്കുള്ളതാണ്. ചട്ടങ്ങളെല്ലാം കാറ്റിൽപ്പറത്തിയാണ് സ്പോൺസർഷിപ്പ് സ്വീകരിച്ചിട്ടുള്ളത്. തിരികെ ആനുകൂല്യങ്ങൾ പ്രതീക്ഷിക്കാതെയാണ് സ്പോൺസർമാർ വരുന്നതെന്ന് പറയുന്നത് അംഗീകരിക്കാനാകില്ല. പ്രതിപക്ഷത്തിരുന്നപ്പോൾ സ്വീകരിച്ച നിലപാടുകൾ ഓർമ്മയുണ്ടാകണം. ജനവിധി ലഭിച്ചു എന്നത് എന്തും ചെയ്യാനുള്ള അധികാരമായി തെറ്റിദ്ധരിക്കരുതെന്നും പി. രാജീവ് കൂട്ടിച്ചേർത്തു.
വിമാനയാത്രയുമായി ബന്ധപ്പെട്ട വിവാദങ്ങൾ കനത്തതോടെ മാധ്യമങ്ങളിൽ നിന്ന് അകലം പാലിക്കുന്ന സമീപനമാണ് മുഖ്യമന്ത്രി വി.ഡി. സതീശൻ സ്വീകരിക്കുന്നത്. കഴിഞ്ഞ ദിവസം ഇടുക്കി കളക്ടറേറ്റിൽ ചേർന്ന ഉന്നതതല യോഗത്തിന് ശേഷം പുറത്തിറങ്ങിയ മുഖ്യമന്ത്രിയോട് മാധ്യമപ്രവർത്തകർ പ്രതികരണം ആരാഞ്ഞപ്പോൾ അദ്ദേഹം രോഷാകുലനായിരുന്നു. ഇതിന് പിന്നാലെ ഇന്ന് കൊച്ചിയിൽ വെച്ച് മുഖ്യമന്ത്രിയോട് ചോദ്യങ്ങൾ ചോദിക്കരുതെന്ന താക്കീതുമായി പോലീസും രംഗത്തെത്തി. മുഖ്യമന്ത്രിയുടെ അരികിലേക്ക് മൈക്കുകളുമായി ചെല്ലരുതെന്നും ദൂരേക്ക് മാറിനിൽക്കണമെന്നുമായിരുന്നു എറണാകുളം എസിപി പീറ്റർ കെ.ജെ. മാധ്യമങ്ങൾക്ക് നൽകിയ നിർദ്ദേശം.
