തിരുവനന്തപുരം: പദവി രാജിവെക്കാൻ നിലവിൽ യാതൊരു ഉദ്ദേശ്യവുമില്ലെന്ന് തിരുവിതാംകൂർ ദേവസ്വം ബോർഡ് പ്രസിഡന്റ് കെ. ജയകുമാർ വ്യക്തമാക്കി. മുഖ്യമന്ത്രിയെ നേരിൽക്കണ്ട് സ്ഥിതിഗതികൾ ധരിപ്പിക്കുമെന്നും, നിശ്ചിത കാലാവധി പൂർത്തിയാക്കുക തന്നെ ചെയ്യുമെന്നും അദ്ദേഹം പറഞ്ഞു. രാജി സംബന്ധിച്ച് പ്രചരിക്കുന്ന വാർത്തകൾ തീർത്തും അടിസ്ഥാനരഹിതമാണ്.
താൻ സ്ഥാനമൊഴിഞ്ഞു കാണണമെന്ന് ആഗ്രഹിക്കുന്ന പലരുമുണ്ടെന്ന് അദ്ദേഹം പറഞ്ഞു. എന്നാൽ ഇപ്പോൾ രാജിവെക്കുന്നതിനെക്കുറിച്ച് ചിന്തിക്കുന്നതേയില്ല. കാലാവധി തീരുന്നതുവരെ പദവിയിൽ തുടരും; ഇത്തരം തെറ്റായ പ്രചാരണങ്ങൾ ഉണ്ടാകുമ്പോൾ എന്തുചെയ്യാനാണെന്നും അദ്ദേഹം ചോദിച്ചു.
ശബരിമല വിഷയത്തിൽ മുഖ്യമന്ത്രിയുടെ പിന്തുണ ഉറപ്പാക്കാൻ കഴിഞ്ഞില്ലെങ്കിൽ ദേവസ്വം ബോർഡ് അധ്യക്ഷ സ്ഥാനം കെ. ജയകുമാർ ഒഴിഞ്ഞേക്കുമെന്ന് നേരത്തെ വാർത്തകൾ പുറത്തുവന്നിരുന്നു. തിരുവിതാംകൂർ ദേവസ്വം ബോർഡും ദേവസ്വം മന്ത്രി കെ. മുരളീധരനും തമ്മിലുള്ള ഭിന്നത രൂക്ഷമായ സാഹചര്യത്തിലാണ് തിരുവനന്തപുരത്ത് നിർണ്ണായക ചർച്ചകൾ നടക്കുന്നത്. ഇതിന്റെ ഭാഗമായി രാവിലെ 11.30-ന് മുഖ്യമന്ത്രി വി.ഡി. സതീശനുമായി ദേവസ്വം ബോർഡ് പ്രസിഡന്റ് കെ. ജയകുമാർ കൂടിക്കാഴ്ച നിശ്ചയിച്ചിട്ടുണ്ട്.
അതേസമയം, മണ്ഡല-മകരവിളക്ക് തീർത്ഥാടനത്തിന് ദിവസങ്ങൾ മാത്രം ശേഷിക്കെ ശബരിമലയിൽ മുന്നൊരുക്കങ്ങളിലെ അനിശ്ചിതത്വം തുടരുകയാണ്. അരവണ നിർമ്മാണത്തിനാവശ്യമായ സാമഗ്രികളുടെ സംഭരണ കരാർ ഇതുവരെ അന്തിമമായിട്ടില്ല. കൂടാതെ, സന്നിധാനത്തെ വ്യാപാരസ്ഥാപനങ്ങളുടെയും ഭക്ഷണശാലകളുടെയും ലേലനടപടികളും പ്രതിസന്ധിയിൽ തുടരുകയാണ്.
