കൊച്ചി: സി.എം.ആർ.എൽ - എക്സാലോജിക് സാമ്പത്തിക ഇടപാടുമായി ബന്ധപ്പെട്ട് ഇ.ഡി അയച്ച കത്തിൻമേൽ അന്വേഷണം പ്രഖ്യാപിച്ചത് സർക്കാരിനെതിരെയുള്ള ജനരോഷത്തിൽ നിന്നും തുടർച്ചയായ വാഗ്ദാന ലംഘനങ്ങളിൽ നിന്നും ജനശ്രദ്ധ തിരിച്ചുവിടാനാണെന്ന് സി.പി.ഐ.എം നേതാവ് അഡ്വ. കെ.എസ്. അരുൺ കുമാർ. ആഭ്യന്തര മന്ത്രി രമേശ് ചെന്നിത്തല അടക്കമുള്ളവർ സി.എം.ആർ.എല്ലിൽ നിന്ന് കൈപ്പറ്റിയതും തിരഞ്ഞെടുപ്പ് കമ്മീഷന്റെ രേഖകളിൽ കാണിക്കാത്തതുമായ പണത്തെക്കുറിച്ചും അന്വേഷിക്കുമെന്ന് കരുതുന്നുവെന്ന് അദ്ദേഹം ചോദിച്ചു. ആ ഡയറിയിൽ പറയുന്ന 181 കോടി രൂപയെക്കുറിച്ച് അന്വേഷിക്കാൻ വിട്ടുപോകരുതെന്ന് ഡി.ജി.പിയെ ഓർമ്മിപ്പിക്കണമെന്നും അദ്ദേഹം പരിഹസിച്ചു. ലാവലിൻ കേസ്, നയതന്ത്ര ബാഗേജ് വഴിയുള്ള സ്വർണ്ണക്കടത്ത്, ബിരിയാണി ചെമ്പിലെയും ഈന്തപ്പഴത്തിന്റെ കുരുവിനുള്ളിലെയും ഖുർആനിലെയും സ്വർണ്ണക്കടത്ത് ആരോപണങ്ങൾ, വടക്കാഞ്ചേരി ഫ്ലാറ്റ് ഇടപാട് എന്നിവയൊക്കെ അന്വേഷിക്കാൻ വന്ന കേന്ദ്ര ഏജൻസികൾ ഒന്നും കണ്ടെത്താനാകാതെ തോറ്റുമടങ്ങിയ ചരിത്രം മറക്കരുതെന്നും ഫേസ്ബുക്ക് പോസ്റ്റിലൂടെ അദ്ദേഹം ഓർമ്മിപ്പിച്ചു.

വ്യവസ്ഥാപിതമായി രണ്ട് കമ്പനികൾ കരാറുണ്ടാക്കി ബാങ്ക് അക്കൗണ്ട് വഴി കൃത്യമായി ആദായനികുതി നൽകി നടത്തിയ ഇടപാടിൽ സംസ്ഥാന സർക്കാരിന് എന്താണ് കാര്യമുണ്ടാകേണ്ടതെന്ന് അദ്ദേഹം ചോദിച്ചു. ആദായനികുതി വകുപ്പ്, തുടർന്ന് ഇന്ററിം സെറ്റിൽമെന്റ് ബോർഡ്, കമ്പനി കാര്യ മന്ത്രാലയത്തിന് കീഴിലെ രജിസ്ട്രാർ ഓഫ് കമ്പനീസ്, സീരിയസ് ഫ്രോഡ് ഇൻവെസ്റ്റിഗേഷൻ ഓഫീസ് (എസ്.എഫ്.ഐ.ഒ), തുടർന്ന് ഇ.ഡി അന്വേഷണങ്ങൾ... ഇത്രയും കേന്ദ്ര ഏജൻസികൾ പരിശോധിച്ചിട്ടും തെളിവൊന്നും ലഭിക്കാതിരുന്ന സാഹചര്യത്തിൽ, ഒടുവിൽ കേരള പോലീസ് വന്ന് തെളിവ് കണ്ടെത്തണമെന്ന് പറയുന്നത് വിരോധാഭാസമാണെന്നും അദ്ദേഹം കുറ്റപ്പെടുത്തി.

പേരുപോലും വെളിപ്പെടുത്താത്ത കോടീശ്വരന്മാരായ സുഹൃത്തുക്കളുടെ സൗജന്യ ആനുകൂല്യങ്ങൾക്കായി പരസ്പരം മത്സരിക്കുന്ന മന്ത്രിസഭയാണിതെന്ന് അരുൺ കുമാർ ആഞ്ഞടിച്ചു. വിദേശയാത്രയ്ക്ക് പോയ മന്ത്രിമാർ ഇപ്പോൾ ഏത് രാജ്യത്താണെന്ന് അവർക്കുപോലും നിശ്ചയമില്ലാത്ത അവസ്ഥയാണ്. ഹെലികോപ്റ്റർ യാത്രകൾ കഴിഞ്ഞ് ഇപ്പോൾ ചാർട്ടേഡ് ഫ്ലൈറ്റുകളിൽ പറന്നുനടക്കുന്ന മുഖ്യമന്ത്രിയും, ചട്ടങ്ങളും ധാർമ്മികതയും കാറ്റിൽപ്പറത്തി സ്വകാര്യ വ്യക്തി നൽകിയ കോടികൾ വിലമതിക്കുന്ന ആഡംബര കാർ സംഭാവനയായി സ്വീകരിച്ച തദ്ദേശ സ്വയംഭരണ വകുപ്പ് മന്ത്രിയും, ഒരു സാമ്പത്തിക വർഷം വാങ്ങേണ്ട മുഴുവൻ കടവും വെറും നാല് മാസം കൊണ്ട് കടമെടുത്ത് പുളകം കൊള്ളുന്ന ധനകാര്യ വകുപ്പ് കൈകാര്യം ചെയ്യുന്ന മുഖ്യമന്ത്രിയുമാണ് കേരളം ഭരിക്കുന്നതെന്നും അരുൺ കുമാർ കുറ്റപ്പെടുത്തി.