കോഴിക്കോട്: സമസ്ത കേരള ജംഇയ്യത്തുൽ ഉലമയുടെ പുതിയ ജനറൽ സെക്രട്ടറിയായി കൊയ്യോട് ഉമർ മുസ്ലിയാരെ തിരഞ്ഞെടുത്തു. നിലവിലെ നേതൃസമിതിയിൽ ട്രഷറർ ചുമതല നിർവ്വഹിച്ചു വരികയായിരുന്നു അദ്ദേഹം. ജനറൽ സെക്രട്ടറിയായിരുന്ന കെ. ആലിക്കുട്ടി മുസ്ലിയാരുടെ വിയോഗത്തെ തുടർന്നാണ് പുതിയ സാരഥിയെ നിശ്ചയിച്ചത്.
കോഴിക്കോട്ട് ചേർന്ന സമസ്ത കേന്ദ്ര മുശാവറ യോഗത്തിലാണ് ഈ നിർണ്ണായക തീരുമാനമുണ്ടായത്. സംഘടനയുടെ വൈസ് പ്രസിഡന്റുമാരായി വി. മൂസക്കോയ മുസ്ലിയാർ, എ.വി. അബ്ദുറഹ്മാൻ മുസ്ലിയാർ എന്നിവരെയും സെക്രട്ടറിയായി പനങ്കാങ്ങര ഹൈദർ ഫൈസിയെയും യോഗം ചുമതലപ്പെടുത്തി. സമസ്തയുടെ ട്രഷറർ പദവിയിലേക്ക് എം.ടി. അബ്ദുല്ല മുസ്ലിയാരെയും തിരഞ്ഞെടുത്തു.
അടിയന്തര പ്രാധാന്യമുള്ള വിഷയങ്ങളിൽ ചർച്ചകളും തീരുമാനങ്ങളും കൈക്കൊള്ളുന്നതിനായി പ്രത്യേക കൂടിയാലോചനാ സമിതിക്കും രൂപം നൽകിയിട്ടുണ്ട്. സയ്യിദ് ജിഫ്രി മുത്തുക്കോയ തങ്ങൾ, കൊയ്യോട് ഉമർ മുസ്ലിയാർ, എം.ടി. അബ്ദുല്ല മുസ്ലിയാർ, എ.വി. അബ്ദുറഹ്മാൻ മുസ്ലിയാർ, ബഹാഉദ്ദീൻ നദ്വി കൂരിയാട്, പി. ഹംസക്കുട്ടി മുസ്ലിയാർ ആദൃശേരി, വാക്കോട് മൊയ്തീൻ കുട്ടി മുസ്ലിയാർ, പി.എം. അബ്ദുസലാം ബാഖവി എന്നിവരാണ് ഈ ഉപദേശക സമിതിയിലെ അംഗങ്ങൾ.
