കോഴിക്കോട്: നാദാപുരം കുമ്മങ്കോട് അജ്ഞാത വന്യജീവിയുടെ ആക്രമണത്തിൽ രണ്ട് പേർക്ക് പരിക്കേറ്റതിനെത്തുടർന്ന് ജീവിയെ കുടുക്കാൻ പ്രദേശത്ത് കൂട് സ്ഥാപിക്കുന്നതിനുള്ള നടപടികൾ ആരംഭിച്ചു. താമരശ്ശേരി, കുറ്റ്യാടി, പെരുവണ്ണാമൂഴി എന്നീ മേഖലകളിൽ നിന്നുള്ള ആർ.ആർ.ടി (ദ്രുതകർമ്മ സേന) സംഘങ്ങൾ സ്ഥലത്തെത്തിയിട്ടുണ്ട്. നാദാപുരം പോലീസും റവന്യൂ വകുപ്പ് ഉദ്യോഗസ്ഥരും പ്രദേശത്ത് ക്യാമ്പ് ചെയ്ത് സ്ഥിതിഗതികൾ നിരീക്ഷിക്കുകയാണ്.
ഉദ്യോഗസ്ഥരുടെ നേതൃത്വത്തിൽ രാത്രി സമയങ്ങളിലും മേഖല കേന്ദ്രീകരിച്ച് ഊർജ്ജിതമായ തിരച്ചിൽ പുരോഗമിക്കുകയാണ്. പ്രദേശവാസികൾക്ക് കർശന ജാഗ്രതാ നിർദ്ദേശം നൽകിയിട്ടുണ്ട്. സുരക്ഷാ മുൻകരുതലിന്റെ ഭാഗമായി പ്രദേശത്തെ മദ്രസയ്ക്കും കുമ്മങ്കോട് ഈസ്റ്റ് എൽ.പി സ്കൂൾ, സൗത്ത് എൽ.പി സ്കൂൾ എന്നിവയ്ക്കും അവധി പ്രഖ്യാപിച്ചു. സമീപത്തെ മറ്റ് വിദ്യാഭ്യാസ സ്ഥാപനങ്ങളിലേക്ക് പോകുന്ന വിദ്യാർത്ഥികൾ അതീവ ജാഗ്രത പാലിക്കണമെന്ന് നിർദ്ദേശമുണ്ട്.
വനമേഖലയോട് ചേർന്നു സ്ഥിതിചെയ്യുന്ന പ്രദേശമാണ് കുമ്മങ്കോട്. ഒരു യുവാവിനെയും വീട്ടമ്മയെയുമാണ് ജീവി ആക്രമിച്ചത്; ആക്രമണം നടത്തിയത് പുലിയാണെന്നാണ് നാട്ടുകാരുടെ ആരോപണം. പുലിക്ക് സമാനമായ വന്യജീവി റോഡിലൂടെ നടന്നുപോകുന്ന ദൃശ്യങ്ങൾ പ്രദേശവാസികൾ മൊബൈൽ ഫോണിൽ പകർത്തിയിരുന്നു. എങ്കിലും, ആക്രമണം നടത്തിയത് പുലി തന്നെയാണോ എന്ന കാര്യത്തിൽ വനംവകുപ്പിന്റെ ഔദ്യോഗിക സ്ഥിരീകരണം ഇതുവരെ ലഭ്യമായിട്ടില്ല.
