കൊച്ചി: വാഹനങ്ങളിൽ നിയമവിരുദ്ധമായി വരുത്തുന്ന രൂപമാറ്റങ്ങൾക്കെതിരെ വീണ്ടും കർക്കശമായ നിലപാടുമായി ഹൈക്കോടതി. പൊതുജനങ്ങളുടെ ജീവനും സുരക്ഷയ്ക്കും ഭീഷണിയാകുന്ന വിഷയങ്ങളിൽ അധികൃതർ കൂടുതൽ ജാഗ്രത കാട്ടണമെന്ന് ഡിവിഷൻ ബെഞ്ച് നിർദ്ദേശിച്ചു. കൃത്യമായ പരിശോധനകൾ നടത്താതെയാണ് പല കാര്യങ്ങളും കടന്നുപോകുന്നതെന്ന് നിരീക്ഷിച്ച കോടതി, വാഹനങ്ങളുടെ ഇത്തരം മോഡിഫിക്കേഷനുകൾക്കെതിരെ കർശന നിരീക്ഷണവും നിയമപരമായ നടപടികളും ഉറപ്പാക്കണമെന്ന് വ്യക്തമാക്കി.
ജീപ്പുകളിൽ അമിത വലുപ്പമുള്ള ടയറുകൾ ഘടിപ്പിക്കുന്നതടക്കമുള്ള രൂപമാറ്റങ്ങൾ വലിയ അപകടങ്ങളിലേക്ക് വഴിതുറക്കുന്നുണ്ടെന്ന് കോടതി ചൂണ്ടിക്കാട്ടി. കാസർഗോഡ്, കോട്ടയം ജില്ലകളിലുണ്ടായ വാഹനാപകടങ്ങളെക്കുറിച്ചും കോടതി പരാമർശിച്ചു. നിർമ്മാതാക്കൾ നിഷ്കർഷിച്ചിട്ടുള്ള മാനദണ്ഡങ്ങളിലും സാങ്കേതിക സവിശേഷതകളിലും വ്യത്യാസം വരുത്തുന്നത് റോഡ് സുരക്ഷയെ പ്രതികൂലമായി ബാധിക്കുമെന്ന് മുൻപും ഹൈക്കോടതി വ്യക്തമാക്കിയിട്ടുണ്ട്.
അനുമതിയില്ലാത്ത അതിതീവ്ര ലൈറ്റുകൾ, വീൽ സ്പേസറുകൾ, ബോഡിക്ക് പുറത്തേക്ക് തള്ളിനിൽക്കുന്ന വീതിയേറിയ ടയറുകൾ എന്നിവ ഘടിപ്പിക്കുന്നതിനെതിരെയും മുൻപ് കോടതി ശക്തമായ നിലപാട് എടുത്തിരുന്നു. ഇത്തരം നിയമവിരുദ്ധ മാറ്റങ്ങൾ നിരത്തിലൂടെ സഞ്ചരിക്കുന്ന മറ്റ് യാത്രക്കാരുടെ ജീവന് വലിയ ഭീഷണിയാണെന്നും കോടതി ആവർത്തിച്ചു.
