കോഴിക്കോട്: അസത്യങ്ങൾ പടച്ചുവിട്ട് സ്വഭാവഹത്യ നടത്താനുള്ള നീക്കങ്ങൾക്കെതിരെ നിയമപരമായ പ്രതിരോധം ശക്തമായി തുടരുമെന്ന് മുൻ മന്ത്രിയും എം.എൽ.എയുമായ പി.എ. മുഹമ്മദ് റിയാസ്. സി.എം.ആർ.എൽ - എക്സാലോജിക് സാമ്പത്തിക ഇടപാടുമായി ബന്ധപ്പെടുത്തി ഓഗസ്റ്റ് 20-ന് മലയാള മനോരമ പത്രം നൽകിയ വാർത്തയ്ക്കെതിരെ ലീഗൽ നോട്ടീസ് അയച്ച് ഒരു മാസം പിന്നിട്ടിട്ടും യാതൊരു വിശദീകരണവും ലഭ്യമായിട്ടില്ലെന്ന് ചൂണ്ടിക്കാട്ടി ഫേസ്ബുക്കിൽ പങ്കുവെച്ച കുറിപ്പിലാണ് അദ്ദേഹം നിലപാട് വ്യക്തമാക്കിയത്. ഒന്നാം പേജിൽ തന്റെ ചിത്രം സഹിതം അച്ചടിച്ചുവന്ന ശുദ്ധ അസംബന്ധത്തെ ഏത് ഗണത്തിലുള്ള മാധ്യമപ്രവർത്തനമായാണ് കാണേണ്ടതെന്നും അദ്ദേഹം ചോദിച്ചു.

ഓഗസ്റ്റ് 20-ലെ മലയാള മനോരമ പത്രത്തിന്റെ മുഖ്യപേജിൽ, സി.എം.ആർ.എല്ലിൽ നിന്നും വീണയ്ക്ക് സേവനത്തിനായി കൈമാറിയ തുക തന്റെ ബാങ്ക് അക്കൗണ്ട് മുഖേന വിവിധ വ്യക്തികളുടെ അക്കൗണ്ടുകളിലേക്ക് മാറ്റിയെന്നും, ഇതുമായി ബന്ധപ്പെട്ട് എൻഫോഴ്സ്മെന്റ് ഡയറക്ടറേറ്റ് (ഇ.ഡി) രണ്ട് പ്രാവശ്യം തന്നെ ഫോണിൽ വിളിച്ച് വിവരങ്ങൾ തേടിയെന്നും കാണിച്ച് ചിത്രം സഹിതം വാർത്ത നൽകിയിരുന്നു. തികച്ചും വ്യാജമായ ഈ വാർത്തയ്ക്കെതിരെ കോടതിയെ സമീപിക്കുമെന്ന് അന്നുതന്നെ വ്യക്തമാക്കിയതാണ്. തുടർന്ന് അഡ്വ. മുനീർ അഹമ്മദ് വഴി 2026 ഓഗസ്റ്റ് 22-ന് മലയാള മനോരമയ്ക്ക് വക്കീൽ നോട്ടീസ് അയച്ചു. പത്രത്തിന്റെ ചുമതലപ്പെട്ടവർക്ക് ഈ നോട്ടീസ് കൈപ്പറ്റിയതായുള്ള രസീതും ലഭിച്ചിട്ടുണ്ട്. എന്നാൽ, ഈ അവാസ്തവ വാർത്തയെക്കുറിച്ച് ഒരു വിശദീകരണവും മറുപടിയായി ഒരു മാസം കഴിഞ്ഞിട്ടും അവരുടെ ഭാഗത്തുനിന്ന് വന്നിട്ടില്ല. ഒന്നാം പേജിൽ സ്വന്തം ചിത്രം സഹിതം കള്ളങ്ങൾ നിരത്തി വാർത്ത നൽകുന്നതിനെ എന്ത് മാധ്യമപ്രവർത്തനമെന്നാണ് വിളിക്കേണ്ടതെന്നും, വ്യാജവാർത്തകളിലൂടെ നടത്തുന്ന വ്യക്തിഹത്യയെ നിയമവഴിയിലൂടെത്തന്നെ നേരിടുമെന്ന തീരുമാനത്തിൽ മാറ്റമില്ലെന്നും റിയാസ് വ്യക്തമാക്കി. വരുമാനത്തിന് അതീതമായി സ്വത്ത് സമ്പാദിച്ചതിന് റിയാസിനെതിരെ 13(1)(ബി) വകുപ്പ് ചുമത്തുമെന്ന മാതൃഭൂമിയുടെ വാർത്തയ്ക്കെതിരെയും നിയമപരമായ നടപടികളിലേക്ക് കടക്കുമെന്ന് അദ്ദേഹം മുൻപ് അറിയിച്ചിരുന്നു.