തിരുവനന്തപുരം: സംസ്ഥാനത്തെ ഭരണകൂടം സംഘപരിവാറിന്റെ 'ബി' ടീമിനെപ്പോലെയാണ് പ്രവർത്തിക്കുന്നതെന്ന് സി.പി.ഐ.എം സംസ്ഥാന സെക്രട്ടറി എം.വി. ഗോവിന്ദൻ ആരോപിച്ചു. പ്രധാനമന്ത്രി നരേന്ദ്ര മോദിയും എൻഫോഴ്സ്മെന്റ് ഡയറക്ടറേറ്റും (ഇ.ഡി) വി.ഡി. സതീശനും ഒത്തുചേർന്ന പ്രത്യേക സഖ്യത്തിന്റെ ഭാഗമായാണ് ഇ.ഡി നിർദ്ദേശപ്രകാരം ഇപ്പോൾ കേസെടുത്തിരിക്കുന്നത്. കേന്ദ്ര സർക്കാർ അന്വേഷണ ഏജൻസികളെ ദുരുപയോഗം ചെയ്തുകൊണ്ട് പ്രതിപക്ഷ നേതാക്കൾക്കെതിരെ നിരന്തരം നടപടികൾ സ്വീകരിക്കുകയാണെന്നും, അതേ മാതൃകയാണ് യു.ഡി.എഫ് സർക്കാരും പിന്തുടരുന്നതെന്നും അദ്ദേഹം കുറ്റപ്പെടുത്തി.

കോൺഗ്രസ്-ലീഗ്-ബി.ജെ.പി സഖ്യകാലം മുതൽ ആരംഭിച്ച ഈ അന്തർധാര ഇപ്പോഴും സജീവമായി തുടരുകയാണ്. തിരഞ്ഞെടുപ്പ് വേളകളിൽ പരസ്പരം സഹായിച്ച ഇവർ, അധികാരത്തിലെത്തിയ ശേഷവും ആ ബന്ധം കൂടുതൽ ശക്തമായി മുന്നോട്ടുകൊണ്ടുപോകുന്നു. പിണറായി വിജയനെ ലക്ഷ്യം വെച്ചുള്ളതാണ് ഇ.ഡിയുടെ നീക്കങ്ങളെന്ന് പാർട്ടി നേരത്തെ തന്നെ വ്യക്തമാക്കിയിട്ടുള്ളതാണ്. ഇ.ഡിക്ക് മുൻപാകെ നൽകിയ ഓരോ മൊഴികളും പിന്നീട് പൂർണ്ണമായി പിൻവലിക്കപ്പെട്ടവയാണ്. അത്തരത്തിലുള്ള വിശ്വാസയോഗ്യമല്ലാത്ത മൊഴികളുടെ മാത്രം അടിസ്ഥാനത്തിൽ കേസ് രജിസ്റ്റർ ചെയ്യുന്നത് കേട്ടുകേൾവിപോലുമില്ലാത്ത കാര്യമാണ്. പൂർണ്ണമായും രാഷ്ട്രീയ ലക്ഷ്യങ്ങൾ മുൻനിർത്തിയുള്ള ശ്രമങ്ങളാണ് അരങ്ങേറുന്നത്. സി.എം.ആർ.എല്ലിൽ നിന്ന് നിയമവിരുദ്ധമായി പണം കൈപ്പറ്റിയെന്ന് പരസ്യമായി സമ്മതിച്ച രണ്ട് മന്ത്രിമാർ നിലവിലെ മന്ത്രിസഭയിലുണ്ട്. എന്തിന്റെ പേരിലാണ് ഈ പണം വാങ്ങിയതെന്ന് അവർ വ്യക്തമാക്കണം. തിരഞ്ഞെടുപ്പ് ഫണ്ടിലേക്കാണ് തുക ലഭിച്ചതെന്നാണ് അവകാശപ്പെടുന്നത്, എന്നാൽ ഇരുപതിനായിരം രൂപയിൽ കൂടുതലുള്ള സംഭാവനകൾ ബാങ്ക് വഴി മാത്രമേ സ്വീകരിക്കാവൂ എന്ന നിയമമുണ്ട്. ഇ.ഡി ശുപാർശയുടെ അടിസ്ഥാനത്തിലുള്ള ഈ അന്വേഷണത്തെ സർവ്വ സന്നാഹങ്ങളോടെയും പ്രതിരോധിക്കുമെന്നും, നിയമപരമായും രാഷ്ട്രീയമായും ഇതിനെ നേരിടുമെന്നും അദ്ദേഹം വ്യക്തമാക്കി. രാഷ്ട്രീയ പ്രേരിതമായ ഈ വേട്ടയാടലിനെതിരെ കേരളം ഒറ്റക്കെട്ടായി അണിനിരക്കുമെന്നും, ഇതിന്റെ ഭാഗമായി സംസ്ഥാന വ്യാപകമായി ഇന്ന് വൈകുന്നേരം പ്രതിഷേധ പരിപാടികൾ സംഘടിപ്പിക്കുമെന്നും എം.വി. ഗോവിന്ദൻ അറിയിച്ചു.

സംസ്ഥാനത്ത് നിലനിൽക്കുന്ന പവർകട്ട് ജനങ്ങളെ വലിയ ദുരിതത്തിലാണ് അകപ്പെടുത്തിയിരിക്കുന്നത്. സെപ്റ്റംബർ 15-നകം പ്രതിസന്ധി പരിഹരിക്കുമെന്ന് മുഖ്യമന്ത്രി ഉറപ്പുനൽകിയെങ്കിലും യാതൊരു മാറ്റവും ഉണ്ടായിട്ടില്ല. ആരോഗ്യ മേഖല ഗുരുതരമായ തകർച്ചയിലൂടെയാണ് കടന്നുപോകുന്നത്; ആശുപത്രികളിൽ മരുന്നുകൾ ലഭ്യമല്ലാത്ത അവസ്ഥയാണ്. ചികിത്സാ പിഴവുകളുടെ പരമ്പര തന്നെ ഇവിടെ നടക്കുന്നുണ്ട്. മാധ്യമസ്ഥാപനങ്ങൾക്കെതിരെ ഭരണകൂടം നടത്തുന്ന ജനാധിപത്യവിരുദ്ധ നടപടികൾ അടിയന്തരാവസ്ഥക്കാലത്തെയാണ് ഓർമ്മിപ്പിക്കുന്നത്. മാനേജ്മെന്റുമായുള്ള തർക്കങ്ങളിൽ പാർട്ടി ഇടപെടാറില്ലെങ്കിലും, മാധ്യമങ്ങളുടെ എഡിറ്റോറിയൽ മുറിയിൽ നേരിട്ട് പോലീസ് അതിക്രമിച്ചു കയറി ഫോൺ പിടിച്ചെടുക്കുന്നത് കേട്ടുകേൾവിയില്ലാത്ത സംഭവമാണ്.

കെ.എം. ഷാജിയുടെ ആഡംബര കാറിലെ യാത്ര പ്രോട്ടോക്കോൾ ലംഘനവും നിയമവിരുദ്ധവുമാണ്. ഇത് സർക്കാരിന് ലാഭകരമാണെന്നാണ് മന്ത്രി സണ്ണി ജോസഫ് ന്യായീകരിക്കുന്നത്. ഇതൊരു ഗൗരവമേറിയ പ്രശ്നമാണ്, എന്നാൽ യാതൊരു ഗൗരവവുമില്ലാതെ നാട്ടുനടപ്പ് പോലെയാണ് കാര്യങ്ങൾ കൈകാര്യം ചെയ്യുന്നത്. ഇതിന് കെ.പി.സി.സി അധ്യക്ഷന്റെ പൂർണ്ണ പിന്തുണയുമുണ്ട്. വലിയ തോതിലുള്ള അഴിമതി ശൃംഖലയാണ് ഇതിലൂടെ രൂപപ്പെടുന്നത്. മുൻപ് ഉടമസ്ഥത വ്യക്തമല്ലാത്ത വാഹനം ഉപയോഗിക്കാൻ അനുമതി തേടിയപ്പോൾ ഗണേഷ് കുമാർ അത് നിഷേധിച്ചിരുന്നു. മറ്റാരുടെയെങ്കിലും വാഹനങ്ങൾ ഔദ്യോഗിക ആവശ്യങ്ങൾക്ക് ഉപയോഗിക്കാൻ കഴിഞ്ഞ സർക്കാർ ഒരിക്കലും അനുവാദം നൽകിയിരുന്നില്ല. മുഖ്യമന്ത്രി വിമാനത്തിൽ നടത്തിയ യാത്ര ആരുടെ ചെലവിലാണ്? ഇത് സുതാര്യമായ രാഷ്ട്രീയ പ്രവർത്തനമാണോ? ഇതിന്റെ യഥാർത്ഥ ചെലവ് വഹിച്ചത് ആരാണെന്ന് അറിയാൻ കേരളത്തിലെ ജനങ്ങൾക്ക് അർഹതയുണ്ട്.

നിരവധി മന്ത്രിമാരാണ് നിലവിൽ ലോകത്തിന്റെ വിവിധ ഭാഗങ്ങളിൽ സന്ദർശനം നടത്തുന്നത്. ഇത് സർക്കാർ ഫണ്ടുപയോഗിച്ചല്ലെന്നാണ് മന്ത്രിമാർ അവകാശപ്പെടുന്നത്. അങ്ങനെയെങ്കിൽ എല്ലാവരും സ്പോൺസർഷിപ്പുകളുടെ സഹായത്തോടെയാണ് യാത്ര ചെയ്യുന്നത്. ഇതും പരിശോധിച്ചാൽ ഭരണഘടനാപരമായ സത്യപ്രതിജ്ഞാ ലംഘനമാണെന്ന് വ്യക്തമാകും. ഒന്നുകിൽ സ്വന്തം ചെലവിൽ യാത്ര ചെയ്യണം, അല്ലെങ്കിൽ ഔദ്യോഗിക ഫണ്ട് ഉപയോഗിക്കണം. ഇതിന് വിരുദ്ധമായതെല്ലാം നിയമലംഘനമാണ്. മഴക്കെടുതിയിൽ ദുരിതമനുഭവിക്കുന്നവർക്ക് മുൻപൊന്നുമില്ലാത്ത രീതിയിൽ ധനസഹായം നൽകുമെന്നാണ് മുഖ്യമന്ത്രി പ്രഖ്യാപിച്ചതെങ്കിലും, ഇന്നുവരെ ഒരാൾക്കും ഒരു രൂപ പോലും ലഭിച്ചിട്ടില്ല. കാര്യമായി യാതൊരു പ്രവർത്തനവും നടത്താതിരിക്കുക എന്നതാണ് സർക്കാരിന്റെ അനുഭവം. കോട്ടയം ജില്ലയിൽ പ്രളയബാധിത പ്രദേശങ്ങളിൽ വിവരശേഖരണം പോലും നടത്താൻ അധികൃതർ തയ്യാറായില്ലെന്നും എം.വി. ഗോവിന്ദൻ കുറ്റപ്പെടുത്തി.