തിരുവനന്തപുരം: മാസപ്പടി വിവാദത്തിൽ എൻഫോഴ്സ്മെന്റ് ഡയറക്ടറേറ്റിന്റെ (ഇ.ഡി) കത്ത് പരിഗണിച്ച് അന്വേഷണത്തിലേക്ക് കടക്കാനുള്ള സർക്കാർ തീരുമാനത്തോട് പ്രതികരിച്ച് മുൻ മന്ത്രി പി.എ. മുഹമ്മദ് റിയാസ് എം.എൽ.എ. ഇത്തരമൊരു അന്വേഷണത്തെക്കുറിച്ച് മാധ്യമങ്ങളിലൂടെ അറിഞ്ഞുള്ള വിവരങ്ങൾ മാത്രമേ നിലവിൽ തനിക്കുള്ളൂവെന്ന് അദ്ദേഹം വ്യക്തമാക്കി. ഒരു വീഴ്ചയും വരുത്തിയിട്ടില്ലാത്തതിനാൽ പൂർണ്ണ ആത്മവിശ്വാസത്തോടെത്തന്നെ മുന്നോട്ടുപോകുമെന്നും, വിഷയത്തിലെ രാഷ്ട്രീയപരമായ നിലപാടുകൾ പാർട്ടി സെക്രട്ടറി വിശദീകരിക്കുമെന്നും മാധ്യമങ്ങളോട് സംസാരിക്കവെ അദ്ദേഹം പറഞ്ഞു.
രാജ്യത്തുടനീളം ഇ.ഡിയുടെ അന്വേഷണ രീതികളെയും ആളുകളെക്കൊണ്ട് മൊഴി കൊടുപ്പിക്കുന്ന ശൈലിയെയും ബി.ജെ.പി വിരുദ്ധ രാഷ്ട്രീയ പ്രസ്ഥാനങ്ങൾ ശക്തമായ ഭാഷയിൽ എതിർത്തിട്ടുണ്ട്. അതിൽ ഏറ്റവും മുൻനിരയിലുണ്ടായിരുന്ന പാർട്ടിയാണ് കോൺഗ്രസ്. എന്നാൽ ഇപ്പോൾ ആ കോൺഗ്രസ് നേതൃത്വം നൽകുന്ന സംസ്ഥാന സർക്കാർ തന്നെ ഇ.ഡിയുടെ കണ്ടെത്തലുകൾ മുഖവിലയ്ക്കെടുത്ത് അന്വേഷണത്തിന് ഉത്തരവിട്ടത് പൊതുസമൂഹം വലിയ തോതിൽ ചർച്ച ചെയ്യുമെന്നും അദ്ദേഹം ചൂണ്ടിക്കാട്ടി.
വിഷയവുമായി ബന്ധപ്പെടുത്തി വലിയ തോതിൽ വ്യാജ പ്രചാരണങ്ങളാണ് നടക്കുന്നത്. അത്തരം അസത്യങ്ങൾക്കെതിരെ നിയമവഴിയിലൂടെത്തന്നെ പോരാടും. തനിക്ക് യാതൊരു ഭയവുമില്ലെന്നും ഒരു തെറ്റും ചെയ്തിട്ടില്ലെന്ന ഉത്തമബോധ്യം ഉള്ളതിനാൽ ഉയർന്ന ആത്മവിശ്വാസത്തോടെ കാര്യങ്ങളെ നേരിടുമെന്നും അദ്ദേഹം ആവർത്തിച്ചു. കേസിലെ മറ്റ് വിശദാംശങ്ങളിലേക്ക് കടക്കുന്നില്ലെങ്കിലും കോൺഗ്രസിന്റെ ഇരട്ടത്താപ്പ് ഇതിലൂടെ വെളിവാകുന്നുണ്ടെന്ന് അദ്ദേഹം കൂട്ടിച്ചേർത്തു.
കർണാടകയിൽ സ്വന്തം മന്ത്രിയുടെ വസതിയിൽ ഇ.ഡി നടത്തിയ റെയ്ഡിനെതിരെ കടുത്ത നിലപാടെടുത്ത പാർട്ടിയാണ് കോൺഗ്രസ്. വരുംദിവസങ്ങളിലെ നിയമപരമായ കാര്യങ്ങൾ വിദഗ്ദ്ധരുമായി കൂടിയാലോചിച്ച് തീരുമാനിക്കും. എങ്ങനെയൊക്കെ പ്രതിസന്ധികൾ ഉണ്ടാക്കാൻ ശ്രമിച്ചാലും താൻ തെറ്റുകാരനല്ല. ആളുകളെ ഭീഷണിപ്പെടുത്തിയും സമ്മർദ്ദത്തിലാക്കിയുമാണ് ഇ.ഡി പല മൊഴികളും ശേഖരിച്ചത്; ഇത് മൊഴി നൽകിയവർ തന്നെ വെളിപ്പെടുത്തിയിട്ടുണ്ട്. ജീവിതത്തിൽ ഇതുവരെ കണ്ടിട്ടുപോലുമില്ലാത്ത ആളുകളെ ചേർത്തുവെച്ച് തനിക്കെതിരെ പല കഥകളും ചമച്ചിട്ടുണ്ടെന്നും റിയാസ് തുറന്നടിച്ചു.
