തിരുവനന്തപുരം:ലോക കേരള സഭയുമായി മുന്നോട്ടുപോകില്ലെന്ന കാര്യത്തിൽ സർക്കാർ ഉറച്ചുനിൽക്കുന്നുവെന്ന് വ്യക്തമാക്കി മുഖ്യമന്ത്രി വി.ഡി. സതീശൻ. ലോക കേരള സഭ ഉപേക്ഷിക്കുക എന്നത് യു.ഡി.എഫിന്റെ പ്രഖ്യാപിത രാഷ്ട്രീയ നിലപാടാണെന്നും അതിൽ ഒരു തരത്തിലുള്ള വ്യതിയാനവുമില്ലെന്നും അദ്ദേഹം ചൂണ്ടിക്കാട്ടി. മുൻ എൽ.ഡി.എഫ് ഭരണകാലത്ത് നടന്ന മാതൃകയിൽ ലോക കേരള സഭ സംഘടിപ്പിക്കാൻ നിലവിലെ സർക്കാർ ഉദ്ദേശിക്കുന്നില്ല. പദ്ധതിയുടെ ആറാം പതിപ്പിനായി സർക്കാർ ബജറ്റിൽ ഒരു രൂപ പോലും നീക്കിവെച്ചിട്ടില്ലെന്നും മുഖ്യമന്ത്രി വ്യക്തമാക്കി.
നിലവിൽ പ്രവർത്തിക്കുന്ന ലോക കേരള സഭ സെക്രട്ടേറിയറ്റ് ഓഫീസിന്റെ ദൈനംദിന അഡ്മിനിസ്ട്രേറ്റീവ് ആവശ്യങ്ങൾക്കും, നോർക്ക വഴി നടപ്പിലാക്കുന്ന ബിസിനസ് ലീഡർഷിപ്പ് മീറ്റ് അടക്കമുള്ള അത്യാവശ്യ പരിപാടികൾക്കും വേണ്ടി മാത്രമാണ് തുക നൽകിയിരിക്കുന്നത്. പ്രവാസികളുടെ ക്ഷേമം ഉറപ്പാക്കുക എന്നത് സർക്കാരിന്റെ മുഖ്യ പരിഗണനയിലുള്ള കാര്യമാണ്. പ്രവാസി ക്ഷേമവുമായി ബന്ധപ്പെട്ട പ്രായോഗിക നിർദ്ദേശങ്ങൾ നടപ്പിൽ വരുത്തുന്നതിനുള്ള പ്രാഥമിക ചെലവുകൾക്ക് കൂടിയാണ് ഈ ഫണ്ട് വിനിയോഗിക്കുകയെന്നും അദ്ദേഹം വ്യക്തമാക്കി. ലോക കേരള സഭയുടെ കാര്യത്തിൽ വി.ഡി. സതീശൻ നിലപാട് തിരുത്തിയെന്ന തരത്തിൽ വാർത്തകൾ പ്രചരിച്ച സാഹചര്യത്തിലാണ് വിശദീകരണവുമായി മുഖ്യമന്ത്രി നേരിട്ടെത്തിയത്.
നേരത്തെ, സതീശൻ സർക്കാർ ലോക കേരള സഭയുമായി മുന്നോട്ട് പോകാൻ തീരുമാനിച്ചുവെന്ന റിപ്പോർട്ടുകൾ പുറത്തുവന്നിരുന്നു. പ്രതിപക്ഷ നേതാവായിരുന്ന കാലത്ത് ഈ പദ്ധതിക്കെതിരെ കടുത്ത വിമർശനങ്ങളാണ് സതീശൻ ഉന്നയിച്ചിരുന്നത്. ലോക കേരള സഭ കേരളത്തിന് തന്നെ അപമാനമാണെന്നും സമ്പന്നരെ മാത്രം വിളിച്ചുകൂട്ടി ഒപ്പമിരുത്തുന്ന രീതി സംസ്ഥാനത്തിനും ഒരു കമ്മ്യൂണിസ്റ്റ് മുഖ്യമന്ത്രിക്കും യോജിച്ചതല്ലെന്നുമായിരുന്നു അദ്ദേഹത്തിന്റെ മുൻകാല നിലപാട്. ഇതിന്റെ മറവിൽ നടക്കുന്ന അനധികൃത പണപ്പിരിവുകളെക്കുറിച്ച് അന്വേഷിച്ച് കുറ്റക്കാർക്കെതിരെ ശക്തമായ നടപടി വേണമെന്നും പദ്ധതി വെറും ധൂർത്താണെന്നും അദ്ദേഹം കുറ്റപ്പെടുത്തിയിരുന്നു. എന്നാൽ അധികാരത്തിലേറിയപ്പോൾ സതീശൻ നിലപാടിൽ മാറ്റം വരുത്തിയെന്ന രീതിയിലുള്ള വിമർശനങ്ങൾ ഉയർന്ന പശ്ചാത്തലത്തിലാണ്, പദ്ധതി തുടരില്ലെന്ന ഉറച്ച നിലപാടിൽ മാറ്റമില്ലെന്ന് വ്യക്തമാക്കി മുഖ്യമന്ത്രി രംഗത്തെത്തിയത്.
