തിരുവനന്തപുരം: ഹൈസ്കൂൾ തലത്തിൽ ഏർപ്പെടുത്തിയിരുന്ന സബ്ജക്ട് മിനിമം മാർക്ക് വ്യവസ്ഥ റദ്ദാക്കിയ സർക്കാർ ഉത്തരവിനെതിരെ രൂക്ഷവിമർശനവുമായി മുൻ വിദ്യാഭ്യാസ മന്ത്രി വി. ശിവൻകുട്ടി രംഗത്ത്. ഭരണകൂടത്തിന്റെ പുതിയ തീരുമാനം സംസ്ഥാനത്തെ പൊതുവിദ്യാഭ്യാസ രംഗത്തെ പിന്നോട്ടടിപ്പിക്കുന്നതും അക്കാദമിക് വഞ്ചനയും ജനവിരുദ്ധവുമാണെന്ന് അദ്ദേഹം കുറ്റപ്പെടുത്തി. കേരളത്തിന്റെ വിദ്യാഭ്യാസ മുന്നേറ്റത്തെ പതിറ്റാണ്ടുകൾ പിന്നിലേക്ക് തള്ളിയിടുന്നതാണ് ഈ ഉത്തരവെന്നും സർക്കാരിന്റെ ഈ അപ്രതീക്ഷിത നടപടിയിൽ ദുരൂഹതയുണ്ടെന്നും അദ്ദേഹം ആരോപിച്ചു.

അക്ഷരങ്ങൾ തിരിച്ചറിയാനോ വായിക്കാനോ കഴിയാത്ത കുട്ടികൾ പോലും എ പ്ലസ് നേടുന്നുവെന്ന വിമർശനങ്ങൾ ഉയർന്ന പശ്ചാത്തലത്തിലാണ് എഴുത്തുപരീക്ഷയിൽ 30 ശതമാനം സബ്ജക്ട് മിനിമം മാർക്ക് ഏർപ്പെടുത്താൻ എൽ.ഡി.എഫ് സർക്കാർ തീരുമാനിച്ചത്. സ്കൂൾതലത്തിൽ പഠനനിലവാരം ഉയർത്തുകയും പിന്നാക്കം നിൽക്കുന്ന കുട്ടികളെ കൈപിടിച്ചുയർത്തുകയുമായിരുന്നു ലക്ഷ്യം. അദ്ധ്യാപകരും വിദ്യാർത്ഥികളും പൊതുസമൂഹവും ഇതിനെ പൂർണ്ണ മനസ്സോടെ സ്വാഗതം ചെയ്തിരുന്നുവെന്നും ശിവൻകുട്ടി ഓർമ്മിപ്പിച്ചു.

എന്നാൽ, പുതിയ നയം പ്രാബല്യത്തിൽ വരുന്നതോടെ പരീക്ഷയ്ക്ക് കേവലം അഞ്ച് മാർക്ക് വാങ്ങുന്നവർ പോലും ജയിക്കുന്ന അപകടകരമായ അവസ്ഥയിലേക്ക് കാര്യങ്ങൾ എത്തുകയാണ്. ഇതോടെ പഠനത്തിൽ പിന്നാക്കം നിൽക്കുന്ന കുട്ടികൾക്ക് ലഭിക്കേണ്ടിയിരുന്ന പ്രത്യേക പരിശീലനങ്ങളും ഇല്ലാതാകും. ദേശീയ വിദ്യാഭ്യാസ നയത്തിന് കീഴടങ്ങുന്ന സമീപനമാണ് കേരളമിപ്പോൾ സ്വീകരിക്കുന്നത്. ആരുമായും കൂടിയാലോചനകൾ നടത്താതെ ഏകപക്ഷീയമായി കൈക്കൊണ്ട ഈ തീരുമാനം സർക്കാർ അടിയന്തരമായി പുനഃപരിശോധിക്കണം.

പദ്ധതി ഒഴിവാക്കാനുള്ള യഥാർത്ഥ കാരണം വ്യക്തമല്ല. കുട്ടികളെ ബോധപൂർവ്വം തോൽപ്പിക്കാനാണെന്ന ആരോപണം മുൻപുണ്ടായിരുന്നെങ്കിലും എല്ലാ ആശങ്കകളും പരിഹരിച്ചാണ് എൽ.ഡി.എഫ് സർക്കാർ മുന്നോട്ട് പോയത്. സാമ്പത്തിക ഭാരമോ മറ്റ് പ്രതിസന്ധികളോ ഇതിലൂടെ സർക്കാരിന് ഉണ്ടാകുന്നില്ലായിരുന്നു. വിദ്യാർത്ഥികളും അദ്ധ്യാപകരും പി.ടി.എയും ഇതിനോട് പൂർണ്ണമായി സഹകരിച്ചിരുന്നു.

പ്ലസ് വൺ അധിക ബാച്ചുകൾ അനുവദിച്ചതിൽ വലിയ അഴിമതി നടന്നിട്ടുണ്ടെന്ന വാർത്തകളുണ്ടെന്നും ഇതിൽ വിജിലൻസ് അന്വേഷണം ആവശ്യമാണെന്നും ശിവൻകുട്ടി പറഞ്ഞു. എയ്ഡഡ് മേഖലയിലെ അദ്ധ്യാപക നിയമന കോഴയെക്കുറിച്ചും അന്വേഷണം വേണം. മലപ്പുറത്തെ 46 സ്കൂളുകളിൽ ഒരു തസ്തികയ്ക്ക് വലിയ തുക കോഴ വാങ്ങുന്നുവെന്ന് മാധ്യമങ്ങൾ റിപ്പോർട്ട് ചെയ്തിരുന്നു. സീറ്റ് ദൗർലഭ്യത്തെ കച്ചവടച്ചരക്കാക്കി മാറ്റുന്നത് അപലപനീയമാണ്. അതിനാൽ, ഈ വിഷയത്തിൽ അന്വേഷണം പൂർത്തിയാകുന്നതുവരെ പുതുതായി അനുവദിച്ച അധിക സീറ്റുകൾ മരവിപ്പിക്കണമെന്നും അദ്ദേഹം ആവശ്യപ്പെട്ടു.