തിരുവനന്തപുരം: ചലച്ചിത്ര സംവിധായകൻ സനൽകുമാർ ശശിധരൻ നടി മഞ്ജു വാര്യരെ ലക്ഷ്യമിട്ട് നടത്തുന്ന അധിക്ഷേപ പരാമർശങ്ങൾക്കെതിരെ ഡിവൈഎഫ്ഐ രംഗത്ത്. പൊതുസമൂഹത്തിന് മുന്നിൽ മഞ്ജു വാര്യരെ വ്യക്തിഹത്യ ചെയ്യുകയും അവർക്കെതിരെ സമരം സംഘടിപ്പിക്കുകയും ചെയ്യുന്ന രീതി നീചവും കടുത്ത പ്രതിഷേധത്തിന് അർഹവുമാണെന്ന് ഡിവൈഎഫ്ഐ പ്രസ്താവിച്ചു. സാമൂഹിക ഉത്തരവാദിത്തമുള്ള പ്രമുഖ കലാകാരിയായ മഞ്ജു വാര്യരുടെ സ്വകാര്യതയിലേക്കും വ്യക്തിസ്വാതന്ത്ര്യത്തിലേക്കും അതിക്രമിച്ചു കയറി അവരെ അപമാനിക്കാൻ ശ്രമിക്കുന്നത് മനുഷ്യത്വവിരുദ്ധവും സ്ത്രീവിരുദ്ധവുമായ നടപടിയാണെന്ന് സംഘടന ചൂണ്ടിക്കാട്ടി. മഞ്ജു വാര്യർക്ക് ഡിവൈഎഫ്ഐ കേരള സംസ്ഥാന സെക്രട്ടേറിയറ്റ് പൂർണ്ണ പിന്തുണയും ഐക്യദാർഢ്യവും പ്രഖ്യാപിക്കുന്നതായി ഫേസ്ബുക്ക് കുറിപ്പിലൂടെ വ്യക്തമാക്കി.
അതേസമയം, സംവിധായകൻ സനൽകുമാർ ശശിധരനെതിരെ നഷ്ടപരിഹാരം ആവശ്യപ്പെട്ട് മഞ്ജു വാര്യർ എറണാകുളം മുൻസിഫ് കോടതിയെ സമീപിച്ചിട്ടുണ്ട്. ഈ ഹർജിയുടെ അടിസ്ഥാനത്തിൽ സനൽകുമാർ ശശിധരന് കോടതി സമൻസ് അയയ്ക്കും. കേസ് വരുന്ന നവംബർ അഞ്ചിന് കോടതി പരിഗണിക്കുമെന്നാണ് വിവരം. ഹർജിയിൽ യൂട്യൂബർ ഷാജൻ സ്കറിയയും മെറ്റ കമ്പനിയും വിശദീകരണം നൽകണമെന്നും ആവശ്യപ്പെടുന്നുണ്ട്. സമൂഹമാധ്യമ പ്ലാറ്റ്ഫോമുകൾ വഴി സനൽകുമാർ ശശിധരൻ അപവാദ പ്രചാരണം നടത്തിയതിനെതിരെ മഞ്ജു വാര്യർ നേരത്തെയും നിയമനടപടി സ്വീകരിച്ചിരുന്നു
