പത്തനംതിട്ട: ജില്ലയിലെ വിവിധ പള്ളി സെമിത്തേരികളിലെ കല്ലറകളിൽ പാകിയ ഗ്രാനൈറ്റുകൾ മോഷ്ടിച്ച കേസിൽ മൂന്ന് തൊഴിലാളികളെ കീഴ്വായ്പൂർ പോലീസ് അറസ്റ്റ് ചെയ്തു. കന്യാകുമാരി സ്വദേശിയായ സുന്ദർ സിംഗ്, പശ്ചിമ ബംഗാൾ സ്വദേശി സുർജിത്, മല്ലപ്പള്ളി സ്വദേശി സജിത്ത് എന്നിവരാണ് പിടിയിലായത്. ഗ്രാനൈറ്റ് പണിക്കാരായ ഇവർ മല്ലപ്പള്ളിയിൽ 'മാതാ ഗ്രാനൈറ്റ്സ്' എന്ന പേരിൽ ഒരു സ്ഥാപനം നടത്തിവരികയായിരുന്നു.
ഓർഡർ അനുസരിച്ച് കല്ലറകളിൽ ഗ്രാനൈറ്റ് ഉറപ്പിക്കുന്ന പ്രതികൾ, പിന്നീട് സൗകര്യപൂർവ്വം ഇളക്കിയെടുക്കാവുന്ന തരത്തിലാണ് ഇവ സ്ഥാപിച്ചിരുന്നത്. തുടർന്ന് രാത്രികാലങ്ങളിൽ ഇതേ ഗ്രാനൈറ്റുകൾ ഇളക്കി മോഷ്ടിക്കുകയും, പുതിയ ഓർഡറുകൾ ലഭിക്കുന്ന മറ്റ് കല്ലറകളിൽ കൊണ്ടുപോയി സ്ഥാപിക്കുകയുമായിരുന്നു ഇവരുടെ രീതി. മോഷ്ടിച്ചെടുക്കുന്ന ഗ്രാനൈറ്റുകൾ കടത്താനായി പ്രതികളിലൊരാളുടെ കാറിന്റെ സീറ്റുകൾ പ്രത്യേക രീതിയിൽ സജ്ജീകരിച്ചിരുന്നു. ഒരു കല്ലറയിൽ ഗ്രാനൈറ്റ് വിരിക്കാൻ 45,000 രൂപ വരെയാണ് ഇവർ വാങ്ങിയിരുന്നതെന്ന് പോലീസ് അന്വേഷണത്തിൽ കണ്ടെത്തി. സ്വന്തം കടയുടെ ഷട്ടറടച്ച് ഉള്ളിലിരുന്ന് മദ്യപിക്കുന്നതിനിടെയാണ് പോലീസ് സംഘം ഇവരെ കയ്യോടെ പിടികൂടിയത്.
ആനിക്കാട് നൂറാമാവ് സെന്റ് തോമസ് മാർത്തോമാ പള്ളിയുടെ സെമിത്തേരിയിലെ കല്ലറയിൽ നിന്നാണ് ഏറ്റവും ഒടുവിൽ ഗ്രാനൈറ്റ് മോഷണം പോയത്. മല്ലപ്പള്ളി മേഖലയിലെ സെമിത്തേരികളിൽ മുമ്പ് അരങ്ങേറിയതിന് സമാനമായ രീതിയിലായിരുന്നു ഇവിടുത്തെയും കവർച്ച. സംഭവത്തിൽ പള്ളി ഭാരവാഹികൾ പോലീസിൽ പരാതി നൽകിയിരുന്നു. നേരത്തെയുണ്ടായ സംഭവങ്ങളിൽ പ്രതികളെ കണ്ടെത്താൻ സാധിച്ചിരുന്നില്ല. അന്വേഷണം പുരോഗമിക്കുന്നതിനിടെയാണ് വീണ്ടും മോഷണമുണ്ടായത്. കീഴ്വായ്പൂർ പോലീസ് സ്റ്റേഷൻ അതിർത്തിക്കുള്ളിൽ കല്ലറകൾക്ക് മുകളിലെ ഗ്രാനൈറ്റുകൾ മോഷണം പോകുന്നത് ഇത് മൂന്നാം തവണയാണ്.
കല്ലറകളുടെ നിർമ്മാണ കരാർ എടുക്കുന്നവരാകാം ഈ മോഷണങ്ങൾക്ക് പിന്നിലെന്ന് പോലീസ് നേരത്തെ സംശയം പ്രകടിപ്പിച്ചിരുന്നു. മുൻപ് മല്ലപ്പള്ളി മാർത്തോമാ പള്ളി സെമിത്തേരിയിലും മല്ലപ്പള്ളി മങ്കുഴിപ്പടി പള്ളി സെമിത്തേരിയിലുമായിരുന്നു സമാന മോഷണങ്ങൾ അരങ്ങേറിയത്. ഭാരമേറിയ ഗ്രാനൈറ്റ് സ്ലാബുകൾ വാഹനങ്ങളുടെ സഹായമില്ലാതെ മാറ്റാനാകില്ലെന്നും, ഒരാൾക്ക് ഒറ്റയ്ക്ക് ഇത് ചെയ്യാൻ കഴിയില്ലെന്നും ഒരു സംഘം ആളുകൾ ഇതിന് പിന്നിലുണ്ടാകുമെന്നും പോലീസ് നേരത്തെ വ്യക്തമാക്കിയിരുന്നു.
