തിരുവനന്തപുരം: ഹൈസ്കൂൾ തലത്തിൽ ഏർപ്പെടുത്തിയിരുന്ന സബ്ജക്ട് മിനിമം മാർക്ക് നിബന്ധന പിൻവലിച്ചുകൊണ്ട് സംസ്ഥാന സർക്കാർ പുതിയ ഉത്തരവ് പുറപ്പെടുവിച്ചു. നടപ്പ് അധ്യയന വർഷത്തേക്കാണ് ഈ സമ്പ്രദായം റദ്ദാക്കിയിരിക്കുന്നത്. പുതിയ തീരുമാനത്തോടെ എട്ട്, ഒൻപത്, പത്ത് ക്ലാസുകളിലെ കുട്ടികൾക്കായി നടത്തിവന്നിരുന്ന അധിക പഠന സഹായ ക്ലാസുകൾ കൂടി നിർത്തലാക്കപ്പെടും. സ്കൂൾ വിദ്യാർത്ഥികളുടെ അക്കാദമിക നിലവാരം മെച്ചപ്പെടുത്തുന്നതിന്റെ ഭാഗമായി മുൻപ് എൽ.ഡി.എഫ് സർക്കാരായിരുന്നു വിഷയങ്ങളിൽ 30 ശതമാനം മിനിമം മാർക്ക് നേടണമെന്ന വ്യവസ്ഥ നടപ്പിലാക്കിയത്.
അക്ഷരങ്ങൾ ശരിയായി എഴുതാനോ വായിക്കാനോ വശമില്ലാത്ത വിദ്യാർത്ഥികൾ പോലും എസ്.എസ്.എൽ.സി പരീക്ഷയിൽ എല്ലാ വിഷയങ്ങളിലും എ പ്ലസ് ഗ്രേഡ് കരസ്ഥമാക്കുന്നുവെന്ന വ്യാപകമായ പരാതി ഉയർന്നതിനെ തുടർന്നായിരുന്നു വിദ്യാഭ്യാസ നിലവാരം സംരക്ഷിക്കാൻ മിനിമം മാർക്ക് മാനദണ്ഡം ഏർപ്പെടുത്തിയത്. ആദ്യപടിയായി എട്ടാം ക്ലാസിലാണ് ഈ പദ്ധതി കൊണ്ടുവന്നത്. തുടർന്ന് തൊട്ടടുത്ത ഘട്ടത്തിൽ ഒൻപതാം ക്ലാസിലേക്കും ഈ നിബന്ധന നിർബന്ധമാക്കുകയായിരുന്നു.
