കൊച്ചി: മാത്യു കുഴൽനാടൻ എം.എൽ.എയുടെ വസതിയിൽ മോഷണം നടത്തിയ പ്രതിയെ പോലീസ് അറസ്റ്റ് ചെയ്തു. പശ്ചിമ ബംഗാൾ സ്വദേശിയായ ബിഷ്ണു മണ്ഡലിനെയാണ് കല്ലൂർക്കാട് പോലീസ് സംഘം കസ്റ്റഡിയിലെടുത്തത്. കഴിഞ്ഞ ദിവസമായിരുന്നു പണി പൂർത്തിയാകാത്ത വീട്ടിനുള്ളിൽ നിന്നും അരലക്ഷം രൂപയോളം മതിപ്പുവിലയുള്ള വയറിംഗ് കേബിളുകൾ ഇയാൾ കവർന്നത്.
എറണാകുളം ജില്ലയിലെ പൈങ്ങോട്ടൂരിൽ നിർമ്മാണ പ്രവർത്തനങ്ങൾ പുരോഗമിക്കുന്ന എം.എൽ.എയുടെ തറവാട്ടു വീട്ടിലായിരുന്നു സംഭവം. കെട്ടിടത്തിലുണ്ടായിരുന്ന ഇലക്ട്രിക് വയറുകളാണ് മോഷണം പോയത്. സംഭവത്തിൽ പോത്താനിക്കാട് പോലീസ് എഫ്.ഐ.ആർ രജിസ്റ്റർ ചെയ്ത് അന്വേഷണം നടത്തുകയായിരുന്നു. കവർച്ച നടന്നതിനെ തുടർന്ന് നിർമ്മാണ ചുമതലയുണ്ടായിരുന്ന കോൺട്രാക്ടർ പോലീസിൽ ഔദ്യോഗികമായി പരാതി നൽകി. 50,000 രൂപ മൂല്യം വരുന്ന കേബിളുകളാണ് നഷ്ടപ്പെട്ടത്. ഞായറാഴ്ച വൈകുന്നേരം 6:30 ഓടെയായിരുന്നു സംഭവം. ജീൻസും ടീഷർട്ടും ധരിച്ചെത്തിയ യുവാവ് വീടിനകത്തേക്ക് പ്രവേശിക്കുന്ന സി.സി.ടി.വി ദൃശ്യങ്ങൾ പോലീസിന് ലഭിച്ചിരുന്നു; ഈ ദൃശ്യങ്ങൾ സമൂഹമാധ്യമങ്ങളിലും പുറത്തുവന്നിരുന്നു.
