തിരുവനന്തപുരം: ലയണൽ മെസ്സിയുടെ പേരിൽ നടന്ന സാമ്പത്തിക തട്ടിപ്പ് കേസുമായി ബന്ധപ്പെട്ട് റിപ്പോർട്ടർ ചാനലിൽ പോലീസ് നടത്തിയ പരിശോധനകളിൽ പ്രതികരണവുമായി മുഖ്യമന്ത്രി വി.ഡി. സതീശൻ. ഇത്തരം പരിശോധനകൾ സർക്കാരിന്റെ രാഷ്ട്രീയ നയമല്ലെന്നും, മറിച്ച് പോലീസിന്റെ സ്വതന്ത്രമായ നിയമനടപടികളുടെ ഭാഗമാണെന്നും അദ്ദേഹം വാർത്താസമ്മേളനത്തിൽ വ്യക്തമാക്കി. ജി.എസ്.ടി വകുപ്പ് നടത്തിയ പ്രാഥമിക പരിശോധനകളിലും കായിക വകുപ്പ് സമർപ്പിച്ച റിപ്പോർട്ടിലും അതീവ ഗുരുതരമായ ക്രമക്കേടുകൾ കണ്ടെത്തിയതിനെ തുടർന്നാണ് നടപടികളിലേക്ക് കടന്നത്. ചാനലിന്റെ സംപ്രേക്ഷണം തടസ്സപ്പെട്ടതായി അറിവില്ലെന്നും, റെയ്ഡ് നടക്കുന്നുവെന്ന വാർത്ത താൻ തത്സമയം കണ്ടതുതന്നെ ആ ചാനലിലൂടെയാണെന്നും മുഖ്യമന്ത്രി കൂട്ടിച്ചേർത്തു.
ഒരു മാധ്യമസ്ഥാപനത്തിൽ അന്വേഷണം നടക്കുന്നതിനെ പ്രതിപക്ഷ നേതാവ് പിണറായി വിജയൻ വിമർശിച്ചതായി കണ്ടു. എന്നാൽ പിണറായി വിജയൻ ഭരണം നടത്തിയിരുന്ന ഘട്ടത്തിൽ നിരവധി മാധ്യമസ്ഥാപനങ്ങളിലേക്ക് പോലീസ് ഇരച്ചുകയറിയതും ഒട്ടേറെ മാധ്യമപ്രവർത്തകർക്കെതിരെ കേസെടുത്തതും മറക്കാനാവില്ലെന്ന് മുഖ്യമന്ത്രി ചൂണ്ടിക്കാട്ടി. കൃത്യമായ സെർച്ച് വാറണ്ടോടെ തികച്ചും നിയമപരമായ മാർഗ്ഗങ്ങളിലൂടെയാണ് ഇപ്പോഴത്തെ പരിശോധന നടന്നതെന്നും അദ്ദേഹം വ്യക്തമാക്കി.
ഇന്ന് അതിരാവിലെയാണ് പ്രത്യേക അന്വേഷണ സംഘം റിപ്പോർട്ടർ ചാനലിന്റെ കൊച്ചി കളമശ്ശേരിയിലുള്ള ആസ്ഥാനത്ത് പരിശോധന നടത്തിയത്. മണിക്കൂറുകളോളമാണ് ഈ നടപടികൾ നീണ്ടുനിന്നത്. കോടതിയിൽ നിന്നുള്ള സെർച്ച് വാറണ്ട് കൈപ്പറ്റിയ ശേഷമാണ് പുലർച്ചെ പോലീസ് സംഘം ചാനൽ ഓഫീസിലേക്ക് എത്തിയത്. തൃക്കാക്കര എ.സി.പിയുടെ നേതൃത്വത്തിലുള്ള പോലീസ് സംഘവും ഈ പരിശോധനയുടെ ഭാഗമായിരുന്നു. എ.ഡി.ജി.പി പി. വിജയന്റെ മേൽനോട്ടത്തിലുള്ള പ്രത്യേക അന്വേഷണ വിഭാഗമാണ് റെയ്ഡുകൾ ഏകോപിപ്പിച്ചത്. ഇതേ സമയത്തുതന്നെ, മെസ്സിയെ കേരളത്തിലെത്തിക്കുമെന്ന് വാഗ്ദാനം നൽകിയ പ്രധാന സ്പോൺസർ ആന്റോ അഗസ്റ്റിന്റെ വസതിയിലും ഓഫീസുകളിലും വയനാട് കേന്ദ്രീകരിച്ച് മറ്റൊരു സംഘം സമാന്തരമായി പരിശോധനകൾ പൂർത്തിയാക്കിയിരുന്നു.
