കോട്ടയം: മഹാത്മാഗാന്ധി സർവ്വകലാശാലയിലെ സ്കൂൾ ഓഫ് കെമിക്കൽ സയൻസസ് ഡയറക്ടർ സ്ഥാനത്തേക്ക് സർവ്വീസ് മാനദണ്ഡങ്ങൾ അട്ടിമറിച്ച് ബി.ജെ.പി അനുകൂല അധ്യാപക സംഘടനാ നേതാവായ ഡോ. രാജു ഫ്രാൻസിസിന് നിയമനം നൽകിയതായി പരാതി. യു.ഡി.എഫ് സിൻഡിക്കേറ്റിന്റെ ഒത്താശയോടെയാണ് ഈ അനധികൃത നിയമനമെന്ന് ചൂണ്ടിക്കാട്ടി മഹാത്മാഗാന്ധി യൂണിവേഴ്സിറ്റി ടീച്ചേഴ്സ് അസോസിയേഷൻ രംഗത്തെത്തി.
വെറും നാല് മാസം മുൻപാണ് ഡോ. എസ്. അനസ് സ്കൂൾ ഓഫ് കെമിക്കൽ സയൻസസിന്റെ ഡയറക്ടറായി ചുമതലയേറ്റത്. മൂന്ന് വർഷത്തെ കാലാവധി പൂർത്തിയാക്കാൻ ബാക്കിനിൽക്കെ, യാതൊരുവിധ മുൻകൂർ വിവരവും നൽകാതെ അദ്ദേഹത്തെ തലപ്പത്തുനിന്ന് പുറത്താക്കുകയായിരുന്നുവെന്ന് ടീച്ചേഴ്സ് അസോസിയേഷൻ കുറ്റപ്പെടുത്തി. ഈ നിയമന നീക്കത്തിനെതിരെ നിയമപോരാട്ടത്തിനായി കോടതിയെ സമീപിക്കാനാണ് സംഘടനയുടെ തീരുമാനം.
സാധാരണയായി സീനിയോറിറ്റി ക്രമം പരിഗണിച്ചാണ് സർവ്വകലാശാലകളിൽ വകുപ്പ് തലവന്മാരെ നിശ്ചയിക്കുന്നത്. അക്കാദമിക് കാരണങ്ങളാലോ മറ്റോ സ്ഥാനമേറ്റെടുക്കാൻ വൈമുഖ്യമുള്ളവർക്ക് അത് രേഖാമൂലം അറിയിക്കാം; അത്തരം സന്ദർഭങ്ങളിൽ മുൻഗണനാ പട്ടികയിലുള്ള അടുത്തയാൾക്ക് അവസരം ലഭിക്കും. മുൻപ് ഈ പദവിയിലേക്ക് പരിഗണിച്ച വേളയിൽ ചുമതലയേൽക്കാൻ താല്പര്യമില്ലെന്ന് എഴുതി നൽകിയ വ്യക്തിയാണ് ഡോ. രാജു ഫ്രാൻസിസെന്ന് അസോസിയേഷൻ പ്രസിഡന്റ് പി.പി. നൗഷാദ് റിപ്പോർട്ടറോട് വെളിപ്പെടുത്തി. റൊട്ടേഷൻ വ്യവസ്ഥയനുസരിച്ച് അടുത്ത ഘട്ടത്തിൽ മാത്രമേ അദ്ദേഹത്തിന് സ്വാഭാവികമായി അവസരം ലഭിക്കുമായിരുന്നുള്ളൂ. എന്നാൽ യു.ഡി.എഫ് ഭരണത്തിലെത്തിയതോടെ ഇത് അട്ടിമറിച്ച് അദ്ദേഹത്തിന് പദവി ഉറപ്പാക്കുകയായിരുന്നു. ചുമതലയേൽക്കാൻ താല്പര്യമുണ്ടെന്ന് കാണിച്ച് രാജു ഫ്രാൻസിസ് വൈസ് ചാൻസലർ ഡി. മാവൂത്തിന് അപേക്ഷ സമർപ്പിക്കുകയും, വി.സി നൽകിയ നിർദ്ദേശം പരിഗണിച്ച് യു.ഡി.എഫ് സിൻഡിക്കേറ്റ് നിയമനത്തിന് പച്ചക്കൊടി കാട്ടുകയുമായിരുന്നുവെന്ന് നൗഷാദ് വ്യക്തമാക്കി.
ഉന്നതവിദ്യാഭ്യാസ, ഗവേഷണ രംഗങ്ങളിലെ മികവിന് സംസ്ഥാന സർക്കാർ ഏർപ്പെടുത്തിയ കൈരളി റിസർച്ച് അവാർഡ് കരസ്ഥമാക്കിയ പ്രമുഖ അധ്യാപകനാണ് ഡോ. എസ്. അനസ്. അദ്ദേഹത്തെ തികച്ചും അപമാനിക്കുന്ന രീതിയിലാണ് നടപടികൾ ഉണ്ടായത്. സെപ്റ്റംബർ എട്ടിന് ചേർന്ന സിൻഡിക്കേറ്റ് യോഗത്തിന്റെ തീരുമാനപ്രകാരം സെപ്റ്റംബർ പത്തിന് പുറപ്പെടുവിച്ച ഉത്തരവിലൂടെയാണ് ഡോ. അനസ് ഉൾപ്പെടെയുള്ളവർ വിവരമറിയുന്നത്. ഉച്ചഭക്ഷണത്തിന് ശേഷം ഓഫീസിലേക്ക് മടങ്ങിയെത്തിയ ഡോ. അനസ് കണ്ടത് തന്റെ ഇരിപ്പിടത്തിൽ രാജു ഫ്രാൻസിസ് കയറിയിരിക്കുന്നതാണ്; ഔദ്യോഗികമായി ചുമതല കൈമാറൽ പോലും നടന്നില്ല. സംഘപരിവാർ സംഘടനാ നേതാവ് കൂടിയായിരുന്ന വി.സിയുടെ പ്രത്യേക താല്പര്യങ്ങളാണ് ഇതിന് പിന്നിലെന്നും വകുപ്പിനെ സംഘപരിവാർ നിയന്ത്രണത്തിലാക്കാനാണ് നീക്കമെന്നും നൗഷാദ് ആരോപിച്ചു.
സർവ്വകലാശാലയിൽ ഏറ്റവും കുറഞ്ഞ ഗവേഷണ ഉൽപ്പാദനക്ഷമതയുള്ള ആളാണ് ഡോ. രാജു ഫ്രാൻസിസ്. അദ്ദേഹത്തിന് കീഴിൽ നിലവിൽ ഒരു ഗവേഷണ വിദ്യാർത്ഥി മാത്രമാണുള്ളത്. ഇയാൾക്കെതിരെ മുൻപും നിരവധി പരാതികൾ ഉയർന്നുവന്നിട്ടുണ്ടെന്നും പല വിദ്യാർത്ഥികളും പിഎച്ച്.ഡി പാതിവഴിയിൽ ഉപേക്ഷിച്ചു പോകുന്ന സാഹചര്യമുണ്ടായിട്ടുണ്ടെന്നും നൗഷാദ് ചൂണ്ടിക്കാട്ടി. അങ്ങനെയുള്ള ഒരാൾ സർവ്വകലാശാലയിലെ മുൻനിര പഠനവിഭാഗമായ സ്കൂൾ ഓഫ് കെമിക്കൽ സയൻസസിന്റെ തലപ്പത്തേക്ക് വരുന്നത് ആശങ്കാജനകമാണെന്നും വകുപ്പിന്റെ അക്കാദമിക് ഭാവിയെ ഇത് അപകടത്തിലാക്കുമെന്നും അസോസിയേഷൻ പ്രസിഡന്റ് കൂട്ടിച്ചേർത്തു.
