തിരുവനന്തപുരം: സിനിമാ തിയേറ്ററുകളിൽ ലഘുഭക്ഷണങ്ങൾക്ക് അമിതവില ഈടാക്കുന്നതുമായി ബന്ധപ്പെട്ട് തിരുവനന്തപുരം നഗരസഭാ മേയറും തിയേറ്റർ ഉടമകളും തമ്മിൽ ചർച്ച നടത്തി. വില്പന നടത്തുന്ന സാധനങ്ങളുടെ വില നിയന്ത്രിക്കാനുള്ള അധികാരം നഗരസഭയ്ക്കില്ലെന്ന് വ്യക്തമാക്കിയ മേയർ, കാണികൾക്ക് ശുദ്ധജലം സൗജന്യമായി ലഭ്യമാക്കാൻ നിർദ്ദേശം നൽകിയതായി അറിയിച്ചു.
ചെറിയ കുട്ടികൾക്കുള്ള ആഹാരസാധനങ്ങൾ തിയേറ്ററിലേക്ക് കൊണ്ടുവരുന്നതിന് തടസ്സങ്ങൾ സൃഷ്ടിക്കരുത്. വാഹനങ്ങൾ പാർക്ക് ചെയ്യാനുള്ള സൗകര്യം തിയേറ്ററിനുള്ളിൽത്തന്നെ ഒരുക്കണം. ലൈസൻസ് ചട്ടങ്ങൾ കൃത്യമായി പാലിക്കണമെന്നും ഇത്തരം കാര്യങ്ങളിൽ നഗരസഭ യാതൊരു വിട്ടുവീഴ്ചയ്ക്കും തയ്യാറല്ലെന്നും അദ്ദേഹം മുന്നറിയിപ്പ് നൽകി. നിർദ്ദേശിച്ച മാറ്റങ്ങൾ നടപ്പിലാക്കാൻ തിയേറ്റർ ഉടമകൾക്ക് 15 ദിവസത്തെ സാവകാശം നൽകിയിട്ടുണ്ട്. ഇതിനുശേഷം കോർപ്പറേഷൻ സ്ക്വാഡ് കർശന പരിശോധന നടത്തും.
കാണികളുടെ ദേഹപരിശോധനയും ബാഗ് പരിശോധനയും നടത്തുമ്പോൾ അതീവ ജാഗ്രത പുലർത്തണം. സ്ത്രീകളെ വനിതാ ജീവനക്കാർ മാത്രമേ പരിശോധിക്കാവൂ; സിനിമ കാണാനെത്തുന്ന പ്രേക്ഷകരുടെ അന്തസ്സിനെ ബാധിക്കുന്ന ഒരുവിധ നടപടികളും അംഗീകരിക്കാൻ കഴിയില്ല. കൂടാതെ, ഫയർ ആൻഡ് സേഫ്റ്റി മാനദണ്ഡങ്ങൾ പാലിക്കുന്നതിൽ യാതൊരു ഇളവും അനുവദിക്കില്ലെന്നും അദ്ദേഹം കൂട്ടിച്ചേർത്തു.
പ്രവർത്തന ലൈസൻസിന് ആവശ്യമായ പല മാനദണ്ഡങ്ങളും തിയേറ്ററുകൾ ലംഘിക്കുന്നതായി ശ്രദ്ധയിൽപ്പെട്ടിട്ടുണ്ടെന്ന് മേയർ ചൂണ്ടിക്കാട്ടി. ഇത്തരം വീഴ്ചകൾ അടിയന്തരമായി പരിഹരിക്കണം. 15 ദിവസത്തിന് ശേഷം വിഷയം വീണ്ടും യോഗം ചേർന്ന് വിലയിരുത്തുമെന്നും, തുടർന്ന് പ്രത്യേക പരിശോധനാ സംഘങ്ങൾ തിയേറ്ററുകളിൽ നേരിട്ടെത്തി പരിശോധനകൾ പൂർത്തിയാക്കുമെന്നും മേയർ വ്യക്തമാക്കി.
